Lottóvinningshafinn óskar nafnleyndar

Konan sem vann 73 milljónir í lottó á dögunum og gaf sig fram í gær hefur óskað nafnleyndar. Þetta segir Stefán Konráðsson, framkvæmdastjóri Íslenskrar getspár. Almenningur mun því ekki fá að vita hver þessi heppna kona er.

Fram kom í vikublaði Akureyrar í gær að vinningshafinn er kvenkyns. Það eina sem Stefán vill gefa upp er að hann er ánægður að vinningurinn hafi ratað til þessa einstaklings. „Þetta kemur í góðar þarfir og þarna eru börn nálægt. Þetta kom á góðan stað og ég get bara verið ánægður með það," segir hann.

Stefán segir vinninshafa yfirleitt óska eftir að vera ekki nafngreindir. „Og þá bara virðum við það," segir hann.

Konan vann einar 73 milljónir króna í lottó þann 9. júní síðastliðinn og gaf sig svo ekki fram fyrr en tveimur vikum síðar.