Lögreglustjóri hvetur stjórnsýsluna til að byrja á facebook

Stefán Eiríksson, lögreglustjóri á höfuðborgarsvæðinu, segir notkun samfélagsmiðla mikilvæga fyrir lögregluna í nýjum pistli. Hann segir lögregluna hafa jákvæða reynslu af notkun samfélagsmiðla og telur að hægt sé að yfirfæra hana á alla aðra opinbera starfsemi.

Lögreglan á höfuðborgarsvæðinu hefur haldið úti facebook síðu og Twitter aðgangi síðustu misseri. Það hefur vakið mikla athygli og meðal annars hlaut lögreglan nýsköpunarverðlaun fyrir hugmyndina. Stefán segir að með starfseminni hafi sýnileiki lögreglunnar aukist, hún hefði nýst vel í forvarnarstarfi og opnað aðgengi almennings til muna.

Í lok pistilsins segir Stefán að annars konar opinber starfsemi gæti vel nýtt sér miðlana. Hann segir þó að nokkur atriði séu mikilvæg svo notkunin gefi góða raun, m.a. að samskipti á síðunum séu ekki of stofnanaleg og að fólk hafi húmor fyrir sjálfu sér.