"Ég er eini lögreglumaðurinn á vakt í Þingeyjarsýslu“

Í kvöld er einn lögreglumaður á vakt á Norðaustur-landi á svæði sem spannar frá Víkurskarði og austur á Bakkafjörð. „Ég er eini lögreglumaðurinn á vakt í Þingeyjarsýslu. Og það eru ekki til peningar til að leysa menn af. Ef að ég myndi veikjast þá yrði bara lokað. Þá yrðu menn bara ræstir út ef upp kæmu neyðartilvik," segir lögreglumaður á vakt á Húsavík.

Vegna niðurskurðar vantar í tvær stöður hjá lögreglunni á norðausturlandi, annars vegar á Þórshöfn og hins vegar á Húsavík. Í ofanálag við það hefur einni lögreglustöð verið lokað á Raufarhöfn. Þar að auki hefur vantað mann í eina stöðu vegna veikinda síðastliðinn mánuð.

Lögreglumaður á vakt segir ekki til peninga til að leysa af menn sem eru í fríi. Þar með er nú bara einn maður á vakt í allri sýslunni á kvöldum sem venjulega hefðu verið þrír á vakt, einn á Þórshöfn og tveir í Húsavík.

„Það eru 160 km austur á Bakkafjörð sem þýðir að við værum komnir þangað í neyðarakstri eftir klukkutíma og tuttugu mínútur," segir hann og bætir við að mögulega yrði þá maður kallaður út frá Vopnafirði, en hann yrði engu að síður 40 mínútur á leiðinni.

Um þessar mundir eru þúsundir ferðamanna á svæðinu, ef ekki tugþúsundir.

Á nokkrum árum hefur akstur lögreglumanna verið skorinn niður um helming á svæðinu.