Fyrsti dagurinn í fríinu var hrein martröð

Íslenskir þremenningar lentu í gær í þeim hörmungum að vera rændir rétt fyrir utan Malaga á Spáni stuttu eftir að þeir stigu útúr flugvélinni.

„Við vorum að fara í frí og misstum aleiguna frekar bókstaflega bara," sagði Unnar Óli Ólafsson, en hann og félagar hans Ragnar Örn Hjálmarsson og Helgi Hákonarson voru á leið í frí syðst á Spáni. Á leiðinni af flugvellinum stoppuðu þeir í korter á skyndibitastað og þegar þeir komu út var búið að hreinsa allt út úr bílnum þeirra.

„Það var búið að brjóta lásinn og hver einasta taska hafði verið tekin. Við vorum hver með sína fartölvuna og föt og gjaldeyri. Allt horfið," segir Unnar. Hann er ekki bjartsýnn á að þýfið komi í leitirnar. „Löggan sagði að þetta gerðist mjög oft og það sé engin leið að hafa upp á þessu."

Þremenningarnir veru sendir á lögreglustöðina til skýrslutöku. Þar eyddu þeir fimm tímum og áttu við töluverða tungumálaörðugleika að stríða, vissu hreinlega ekki hvað komst til skila af því sem þeir sögðu.

Þegar það var afstaðið þurftu þeir að finna aukalykla að húsnæðinu sem þeir ætluðu að eyða fríinu í, enda höfðu þeir horfið með farangrinum. Það tókst þó að lokum og nú eyða þeir fríinu alls lausir við ströndina á Suður-Spáni eftir að fyrsti dagurinn snerist upp í hreina martröð.