Telja að útflutningur á hestum muni aukast

Íslenskir hestamenn telja að útflutningur hesta komi til með að aukast á árinu. Útflutningurinn minnkaði verulega í kjölfar hestapestarinar sem hér geisaði árið 2010.

Sérstökum sölubásum með íslenskum hestum hefur verið komið upp á Landsmóti hestamanna sem nú stendur yfir enda þar saman komnir hestaáhugamenn víða að úr veröldinni.

Langflestir hestar eru fluttir til Þýskalands, þá Svíþjóðar og svo Danmerkur.

Árið 2008 voru um átján hundruð hestar fluttir út og litlu færri árið 2009. Það var síðan árið 2010 sem hestapestin geisaði og aðeins tæplega tólf hundruð hestar voru fluttir út. Í fyrra voru þeir enn færri, um ellefuhundruð.

Býstu við að markaðurinn sé að taka við sér aftur?

„Já, mér finnst það," segir Eysteinn Leifsson, hestaútflytjandi.

Salan fer hægt af stað fyrstu dagana á Landsmóti.

„Mest er það nú fólk að leita sér að hrossum í keppni. Áhuginn virðist liggja þar. Það er verið að leita í meiri gæði. Svo er fólk líka að leita sér að sínum reiðhesti en mest liggur áhuginn þar í keppnishrossum,"

Síðan eru það sumir sem kíkja í sölubásana af hreinni forvitni.

„Það er náttúrlega oft sem fólk ætlar ekkert að kaupa sér hest en svo bara stenst það ekki freistinguna," segir Eysteinn.

Meðal þeirra sem eru til sölu eru Ofsi frá Margrétarhofi sem er keppnishestur, en hann er undan hinum víðfræga Orra frá Þúfu.

En hvað vill eigandinn fá fyrir Ofsa?

„Kringum þrjár milljónir kannski. En þú getur ábyggilega fengið hann fyrir eitthvað minna ef þú ert með peninginn á þér," segir Reynir Örn Pálmason, eigandi Ofsa.