Langar raðir á kjörstað í kvöld

Nú klukkan hálf tíu í kvöld voru langar raðir fyrir utan Laugardalshöllina af fólki sem ætlaði að greiða atkvæði fyrir forsetakosningarnar utan kjörfundar.

Mikil aðsókn hefur verið til að fá að greiða atkvæði utan kjörfundar. Í dag voru greidd 3.461 og þar með er heildarfjöldi atkvæða orðinn 27.711. Það er töluvert hærra hlutfall af utankjörfundaratkvæðum en áður hefur þekkst.

Stjórnmálafræðingur sagði ástæðuna mögulega vera meiri áhuga fólks á þessum kosningum en benti sömuleiðis á að árstíminn gæti spilað inn í, enda fólk á faraldsfæti yfir sumartímann.

Kjörstaðir loka klukkkan 10 á kvöldin og þeir sem ætluðu að skjótast fyrir lokun og henda atkvæðinu sínu inn duttu ekki beinlínis í lukkupottinn. Þeir máttu bíða í röðum sem náðu langt út úr húsinu eftir að krota þennan dýrmæta kross á kjörblaðið.