Bayern vill fá Guardiola næsta sumar

Þýska blaðið Bild greinir frá því að Bayern München sé í viðræðum við spænska þjálfarann Pep Guardiola um að taka við liðinu árið 2013. Þá rennur samningur Jupp Heynckes við félagið út.

Samkvæmt heimildum blaðsins þá ræddi Christian Nerlinger, yfirmaður knattspyrnumála hjá Bayern, við bróður Pep í síðasta mánuði.

Bild segir að Guardiola hafi lýst yfir áhuga á starfinu. Hann vilji taka sér frí í eitt ár og það henti honum vel að koma aftur í þjálfun næsta sumar.

Holger Badstuber, leikmaður Bayern og þýska landsliðsins, segir að það verði erfitt að feta í fótspor Heynckes.

"Þetta eru nýjar fréttir fyrir mig. Við erum með goðsagnakenndan þjálfara í Heynckes og það verður ekki auðvelt að fylla hans skarð," sagði Badstuber.