Siggi fékk póst fyrir mistök - ætlar ekki að kjósa Samstöðu

„Ég ætla ekki að kjósa Samstöðu eftir þetta," sagði Sigurður Þ. Ragnarsson, eða Siggi stormur eins og hann er kallaður, en hann fékk fyrir misskilningi póstsamskipti á milli Lilju Mósesdóttur og Marinó G. Njálssonar.

Um var að ræða svarpóst þar sem Lilja útskýrir fyrir Marinó af hverju Siggi hætti í Samstöðu. Í stað þess að senda póstinn beint á hann, sendi Lilja póstinn á alla stjórnina.

Siggi sagði innihald póstsins hafa verið slíkt að þar hafi verið dregin upp röng mynd af ástæðum þess að hann hætti. „Hún dregur upp mjög skringilega mynd af þessu," segir Siggi sem fékk póstinn á milli níu og tíu í morgun, eftir að hann tilkynnti um úrsögn sína.

„Ég svaraði henni bara og sagði henni að hún væri að draga upp stílfærða mynd af þessu öllu saman," segir Siggi.

„Ég hélt að hún væri vandaðri en þetta," segir Siggi sem segist hafa orðið fyrir miklum vonbrigðum með viðbrögðin.