Starfsfólk ÁTVR hefur greinilega ekkert að gera í vinnunni

„Þetta er forsjárhyggja hjá ríkisstarfsfólki sem hefur greinilega ekkert að gera í vinnunni," segir Sveinn Andri Sveinsson, lögmaður, um þá ákvörðun ríkisins að vilja ekki taka Motörhead-rauðvín í sölu. Hann var gestur í þættinum Reykjavík síðdegis á Bylgjunni fyrr í dag.

ÁTVR hafnaði umsókninni meðal annars á með þeim rökum að annars vegar hefði hljómsveitin Motörhead ekkert með vínið að gera, annað en að nafn hennar væri á flöskunni, og hins vegar að skilaboðin sem fylgdu nafninu væru miður falleg. Þannig sé enska orðið ‚motorhead' slanguryrði yfir amfetamínneytanda og þar að auki fjalli textar sveitarinnar „iðulega um stríð, misnotkun valds, óábyrgt kynlíf og misnotkun vímuefna".

Sveinn Andri segir að ákvörðun ÁTVR stenst ekki nánari skoðun. „Það verða nú að vera einhver málefnaleg sjónarmið fyrir því að neita að taka einhverja áfengistegund til sölu. Ég las einhvers staðar að einhverjir ferðaglöðustu starfsmenn ríkisins væru starfsmenn ÁTVR, sem ferðuðust mikið út í vínhéruð út í heimi þrátt fyrir það að vera ekki að flytja neitt sjálfir inn af áfengi. En nú er maður að átta sig á því hvað þeir eru að gera í þessum ferðum, þeir eru velta því fyrir sér hvað nöfnin á víntegundum þýða og fara aðeins dýpra í það. Það má auðvitað ekki flytja inn vín sem þýða eitthvað nógu sniðugt. Maður hlýtur að staldra aðeins við og velta því fyrir sér hvað þetta fólk er að gera í vinnunni," segir Sveinn Andri.

Hann segir ákvörðunina vera grín. „Þetta tekur engu tali að ríkisstarfsmenn séu að skipta sér af því hvað víntegundirnar heiti, það er bara eins og hvert annað grín. Þetta segir manni það að það eru of margir starfsmenn hjá ÁTVR. Það þarf bara að skera þar niður um helming og þá hætta þeir að pæla í því hvað er í textunum hjá einhverjum hljómsveitum sem heita Motörhead. Þetta er súrelaískt. Þetta stenst engar stjórnsýslureglur að synja mönnum um innflutning á víni út af því hvaða nafn er á vínflöskunum," segir Sveinn Andri í viðtali við Reykjavík síðdegis.

Hægt er að hlusta á viðtalið við Svein Andra í Útvarpi Vísis eða með því að smella á hlekkinn hér að ofan.