Þingmaður: Ríkisendurskoðandi fer yfir reikninga frá bróður sínum

„Ríkisendurskoðandi er að endurskoða gjörðir Samfylkingarinnar nánast á hverjum degi og hann er líka að endurskoða fjármálaráðuneytið. Þar situr bróðir hans sem yfirmaður í rauninni á ríkiskassanum sjálfur," segir Höskuldur Þór Þórhallsson, þingmaður Framsóknarflokksins, í samtali við þáttinn Reykjavík síðdegis á Bylgjunni.

Höskuldur var í símaviðtali í þættinum í dag og ræddi þar meðal annars upphrópanir pólitíkusa, Vaðlaheiðargöng og ríkisendurskoðanda.

Hann sagði að Sveinn Arason, ríkisendurskoðandi, hafi sagt hluti sem hafi komið sér mjög á óvart. „Hann sagðist vera tengdur Kristjáni Möller, sem er í stjórn Greiðrar leiðar. Ég held að það hafi verið mikil mistök að alþingismaður hafi verið látinn taka sæti í stjórn einkahlutafélags. Þar sem það er verið að blanda saman ólíkum hlutum," sagði hann meðal annars í þættinum

Þá sagði hann að skoða ætti þær reglur sem gilda um almennt hæfi einstaklinga. „Ég held að við séum komin á þann stað í þjóðfélaginu að þetta gengur ekki lengur. Ég held að það hafi verið ágætt að mörgu leyti að hann lýsti sig sjálfan sig vanhæfan og við skulum þá bara spyrja: Er hann vanhæfur til að endurskoða ríkisreikninginn sem kemur frá bróður hans?" sagði Höskuldur meðal annars í þættinum.

Hægt er að hlusta á viðtalið við Höskuld með því að smella á hlekkinn hér að ofan.