Ferðamannaárið hefst á miklum krafti - Eyjafjallajökli þakkað

Helstu fyrirtæki í ferðamannageiranum kynna um helgina fyrir erlendum kaupendum þá þjónustu sem þeir bjóða. Á kaupstefnu á vegum Icelandair eru saman komnir yfir 500 fulltrúar flugfélaga, hótela, veitingastaða, rútufyrirtækja, sjósiglinga, jeppaferða og annarra í þessari ört vaxandi atvinnugrein. Og árið byrjar af krafti.

Ólöf Ýrr Atladóttir ferðamálastjóri segir að nýjar tölur um ferðamannafjölda í janúar sýni tæplega 20 prósenta aukningu frá því í fyrra. Fólk í greininni beri sig mjög vel gagnvart sumrinu og menn horfi bjartsýnir til ársins. Þá skipti það máli að framboð á flugi sé mikið.

Hér tala menn um að eldgosið í Eyjafjallajökli hafi kannski ekki verið alslæmt. Er það kannski verðmætasta auglýsingin sem ferðaþjónustan gat fengið?

Ólöf Ýrr segir að oft sé haft á orði að einhver athygli sé betri en engin. Í þessu tilviki hafi eldgosið auglýst einkenni Íslands og íslenskrar náttúru sem aldrei fyrr.

"Já, ég held að þetta hafi, svona til langs tíma, gert okkur afar gott," segir ferðamálastjóri.