Fór í ófrjósemisaðgerð - fékk lífhimnubólgu en engar bætur

Íslenska ríkið var sýknað af skaðabótakröfu konu sem krafðist sjö milljóna vegna meintra læknamistaka. Konan fór í ófrjósemisaðgerð árið 2002. Aðgerðin virtist hafa gengið vel og var hún því útskrifuð af spítalanum.

Rúmri viku síðar snéri konan aftur á spítalann vegna vaxandi verkja í neðri hluta kviðar og síðu hægra megin. Vaknaði grunur um lífhimnubólgu og möguleg tengsl við ófrjósemisaðgerðina.

Konan var sett á sýklalyf og ýmsar rannsóknir gerðar. Skýr merki komu fram um lífhimnubólgu. Fór hún strax í aðgerð og komu þá í ljós tvö fremur lítil göt á smágirni með um 7 sentímetra millibili. Var garnabútur fjarlægður og endarnir saumaðir saman

Konan vildi meina að um saknæma og ólögmæta háttsemi hafi verið að ræða hjá lækninum sem ylli því að hún ætti rétt á bótum. Ríkið mótmælti því ekki að götin urðu til við aðgerðina, en taldi að um óhappatilviljun væri að ræða.

Að áliti sérfróðra meðdómara er tíðni þessa fylgikvilla 2-5 tilfelli á hverjar 1000 kviðsjáraðgerðir sem gerðar eru. Oftast koma þessir skaðar ekki í ljós fyrr en 4 til 10 dögum eftir aðgerð og er það væntanlega vegna þess að einungis er um yfirborðsskaða að ræða í sjálfri aðgerðinni og eiginlegt gat kemur ekki á görnina fyrr en einhverjum dögum síðar með þeim einkennum sem því fylgja.

Skaðar þessir eru því ekki fyrirsjáanlegir og því erfitt að gera undirbúnings- eða varúðarráðstafanir við aðgerðina umfram það sem almennt er gert við þessar tegundir aðgerða.

Því sýknaði Héraðsdómur Reykjavíkur ríkið af skaðabótakröfu konunnar.