Ætlar að bregða búi vegna Funamálsins

Steingrímur Jónsson, bóndi í Efri-Engidal, sér enga framtíð í áframhaldandi búskap í Efri-Engidal eftir að niðurstöður mælinga Matvælastofnunar staðfestu díoxínmengun í mjólk, kjöti og fóðri á bænum.

Steingrímur segir það hafa komið sem reiðarslag á föstudag þegar niðurstöður sýnatöku á bænum lágu fyrir á föstudag. Vonir hans hafi brugðist um að upphafleg mæling Mjólkursamsölunnar á bænum í desember hefði ekki sýnt rétta mynd af stöðunni.

Af þeim tólf kjötsýnum sem tekin voru vegna díoxíns á svæðinu reyndust aðeins tvö eðlileg. Átta sýni sýndu verulega hækkun en tvö voru yfir hámarksviðmiðunarmörkum. Öll sýni frá Efri-Engidal, kjöt, mjólk og fóður, voru menguð.

„Ég tek bara einn dag í einu,“ segir Steingrímur þegar hann er spurður um hvort hann ætli að leita réttar síns og krefjast bóta. „Við höldum ennþá skepnunum, og ég vil ekki hugsa mikið um framhaldið.“ Steingrímur hefur haft að jafnaði fimmtán til sextán kýr í fjósi og um áttatíu kindur. Sýnt er að þessi bústofn Steingríms verður felldur. Þá eru nokkrir frístundabænda á svæðinu með kindur og nautgripi í nálægð við sorpbrennsluna. Það er mat Matvælastofnunar að 350 til 400 gripir verði felldir þegar upp er staðið.

Halldór Runólfsson, yfirdýralæknir hjá Matvælastofnun, segir svo stutt liðið frá því að niðurstöður sýnatöku lágu fyrir að engar ákvarðanir hafi verið teknar um framhaldið á vegum embættisins. „Þessum dýrum líður ekkert illa, en það er ekki hægt að setja afurðir af þeim á markað. Það verður að ræða við fólkið sem á þessar skepnur og umhverfisyfirvalda er að ákveða hvernig staðið verður að förgun.“

Spurður hvernig fólki á svæðinu verður bættur skaðinn segir Halldór að þegar fé sé skorið niður vegna riðuveiki þá fái bændur bætt sín dýr og afurðatjónsbætur séu reiknaðar í tvö ár, eða áður en leyfilegt er að dýr séu tekin aftur. „Það verður örugglega erfitt að reikna það út hvernig þetta verður bætt og ég veit ekki hver ber ábyrgðina á þessu.“

Eins og komið hefur fram þá var sorpbrennslan Funi í Engidal eign Ísafjarðarbæjar. Eftirlitsaðili með brennslunni á meðan hún starfaði var Umhverfisstofnun, sem heyrir undir umhverfisráðuneytið.

svavar@frettabladid.is