Ungar stúlkur kúgaðar með niðurlægjandi ljósmyndum

Glæpamenn nota niðurlægjandi ljósmyndir af ungum stúlkum sem kúgunartæki. Þetta fullyrða lögreglumenn, forstöðumaður Stuðla og Barnaheilla. Ungar stúlkur lendi í klóm glæpaklíka hér á landi rétt eins og í útlöndum og afar erfitt geti reynst að losna úr klóm þeirra.

Óprúttnir aðilar nota netið til að kúga unglinga til fylgilags við sig með því að hóta að birta af þeim niðurlægjandi myndir á netinu. Myndirnar eru oft teknar þegar unglingarnir eru undir áhrifum vímuefna og í kynferðislegum athöfnum.

Ríkislögreglustjóri, Barnaheill, Stígamót og aðrir sem láta sér annt um velferð ungmenna hafa beitt sér fyrir lokun síðna sem birta slíkar myndir, en samskonar síður spretta nánast samstundis upp aftur. Á ákveðni síðu sem fréttastofa skoðaði í dag eru myndir og nöfn ungra stúlkna og stundum gantast með nauðganir og annað gróft kynferðisofbeldi sem þær hafa orðið fyrir.

Petrína Ásgeirsdóttir, framkvæmdastjóri Barnaheilla, hefur hefur reynt að styðja fórnarlömb í því að leita réttar síns. „Hinsvegar eru þessi mál ofboðslega erfið vegna þess að þessir óprúttnu aðilar svífast oft einskis. Þegar mynd er einu sinni komin á netið er oft mjög erfitt að ná henni til baka og það vita þær stúlkur sem hafa orðið fyrir þessu og þetta er notað sem kúgunartæki."

DV hefur að undanförnu fjallað um málefni ungmenna sem lenda í klóm glæpamanna sem misnota þau kynferðislega, ógna þeim og sjá þeim fyrir fíkniefnum.

Forstöðumaður og sálfræðingur hjá Stuðlum sagði í samtali við fréttastofu að ungmennin hafi oft orðið fyrir alvarlegu ofbeldi. Hótanir um myndbirtingu dragi úr líkum á að þau leiti réttar síns auk þess sem sjálfsmynd þeirra sé oft mölbrotin. Foreldrar reyni gjarnan að aðstoða þau en verði þá sjálf fyrir hótunum. Þekkt sé í útlöndum að glæpaklíkur vilji hafa ungar stúlkur til afnota og það sé ekkert öðruvísi hér á landi.