Finnst svona ekki eiga að líðast

Ólafur Örn Ingólfsson hagfræðingur, einn þeirra umsækjenda um starf forstjóra Bankasýslu ríkisins sem ekki hlutu náð fyrir augum stjórnarinnar, er afar ósáttur við vinnubrögð í ráðningarferlinu og hyggst kalla eftir frekari rökstuðningi.

„Það sem mér finnst standa upp úr er að það virðist sem stjórnin hafi ekki farið að lögum um Bankasýslu ríkisins varðandi hæfniskröfur og reynslu af störfum fyrir fjármálastofnanir og banka þegar kemur að ráðningu forstjóra,“ segir Ólafur Örn í samtali við Fréttablaðið.

Aðspurður sagðist hann óviss um hverjar málalyktir yrðu, „en mér finnst fyrst og fremst að maður eigi ekki að láta svona nokkuð líðast“.

Páll Magnússon, bæjarritari hjá Kópavogsbæ og fyrrum aðstoðarmaður Valgerðar Sverrisdóttir viðskiptaráðherra, var ráðinn úr hópi fjögurra umsækjenda þrátt fyrir að hann hafi minnsta reynslu að baki í störfum fyrir fjármálastofnanir.

Ráðningin hefur kallað á hörð viðbrögð en í samtali við Bylgjuna í gær sagðist Steingrímur J. Sigfússon fjármálaráðherra bæði treysta því og vona að faglega hafi verið staðið að ráðningu Páls.

- þj