Heimir: Væntum mikils af Hannesi

"Það er enginn spurning að Hannes kemur til með að styrkja FH-liðið. Hann hefur æft tölvuvert með okkur í vetur þannig að við vitum alveg hvað við erum að fá. Við væntum mikils af honum enda öflugur leikmaður," sagði Heimir Guðjónsson, þjálfari FH, um nýjasta liðsstyrkinn en Hannes Þ. Sigurðsson skrifaði undir samning við FH í dag.

Það hafa orðið talsverðar breytingar á FH-liðinu milli ára. Er Heimir ánægður með hvernig hefur gengið að púsla liðinu saman?

"Ég er mjög ánægður með hópinn og ég tel að við séum með sterkara lið í dag heldur en á sama tíma í fyrra. Það er meiri samkeppni og það þarf að vera samkeppni ef menn ætla að ná árangri. Við erum því sáttir í dag," sagði Heimir en er hann með meistaralið í höndunum?

"Það eru alltaf sömu áherslurnar í Krikanum. Við ætlum að keppa um þá titla sem eru í boði. Það breytist ekkert," sagði Heimir.