Standa fast við kröfu um 200 þúsund króna lágmarkslaun

Sökum hægagangs í kjaraviðræðum hefur Framsýn í Þingeyjarsýslum afturkallað samningsumboð sitt frá Starfsgreinasambandi Íslands (SGS).

Framsýn er annað félagið sem fer þá leið að ræða sjálfstætt við Samtök atvinnulífsins (SA) og fetar það í fótspor Verkalýðsfélags Akraness sem ákvað í síðustu viku að fara eigin leið.

Aðalsteinn Baldursson, formaður Framsýnar, segir að áherslubreytingar SGS í kjaraviðræðum, meðal annars að hætta við kröfu um 200.000 króna lágmarkslaun, sé óviðunandi og því hafi aukaaðalfundur félagsins ákveðið að draga samningsumboðið til baka.

„Það er allt í einu tekin ákvörðun innan sambandsins um að fara að horfa til þriggja ára samnings með krónutöluhækkun á lægstu laun og prósentuhækkun fyrir hærri laun. Það hefði leitt til þess að þeir tekjuhærri hefðu fengið meira í vasann en þeir tekjulægri og við sættum okkur ekki við það."

Aðalsteinn segir viðræður við atvinnurekendur þegar komnar á fulla ferð og ganga vel.

„Það er góður andi í okkar viðræðum og ég get ekki kvartað undan þeim viðbrögðum sem ég hef fengið."

Björn Snæbjörnsson, formaður samninganefndar SGS, segir að auðvitað sé slæmt að missa menn úr hópnum, en félögum sé frjálst að draga umboð sín til baka hvenær sem er.

„Ef þeim finnst þeir vera í betri stöðu einir og sér er það bara gott mál," segir Björn.

„Megi þeim ganga vel."

Viðræður SGS og SA hafa ekki skilað miklum árangri og eru í biðstöðu eftir síðasta fund, sem var haldinn á miðvikudag.

Föst skot hafa gengið manna á milli þar sem krafa SA um að sjávarútvegsmál verði til lykta leidd á Alþingi áður en lengra er haldið í kjaraviðræðum hefur valdið úlfúð innan verkalýðshreyfingarinnar og hjá stjórnvöldum.

Í yfirlýsingu frá SGS eftir fundinn á miðvikudag segir að kröfu SA sé „ætlað að þvinga stjórnarvöld til að framkvæma eitthvað sem þeim ber ekki að gera samkvæmt ákvæðum laga [...]". Standi SA við kröfu sína telur SGS að með því séu lög um meðferð kjaraviðræðna vanvirt og viðræður því árangurslausar.thorgils@frettabladid.is