Myndaði fund milljarðamærings með íslenskum ráðherrum

Vinnuheiti nýrrar heimildarmyndar hinnar bandarísku Judith Ehrlich, þar sem þingkonan Birgitta Jónsdóttir kemur við sögu, er Iceland: The Mouse That Roared.

Eins og komið hefur fram í Fréttablaðinu fjallar myndin um Wikileaks-síðuna og verkefni Birgittu, Iceland Modern Media Initiative, þar sem lögð er áhersla á aukið upplýsingafrelsi.

Ehrlich er nýfarin af landi brott eftir tökur hér á landi. Þar var meðal annars myndaður fundur bandaríska internets-frumkvöðulsins Brewster Kahle og þeirra Ögmundar Jónassonar innanríkisráðherra og Katrínar Jakobsdóttur menntamálaráðherra. Kahle er milljarðamæringur sem vill að Ísland verði fyrsta þjóð heimsins til að færa allar bækur sínar yfir á stafrænt form. Reiknað er með að verkefnið kosti um eina milljón dollara, eða um 115 milljónir króna. Kahle hefur nú þegar þróað kerfi sem hefur fært um tvær og hálfa milljón bóka annarra landa yfir á stafrænt form.

Ehrlich var tilnefnd til Óskarsverðlauna fyrir heimildarmynd sína The Most Dangerous Man In America og kynnti hana á RIFF í Reykjavík. Í framhaldinu fékk hún áhuga á Birgittu og hennar baráttu fyrir auknu upplýsingafrelsi. „Ég hef mikið álit á henni. Þessi barátta virðist vera henni eðlislæg og hún notar innsæi sitt í þessari baráttu fyrir frelsi og auknu gegnsæi," segir Ehrlich.

Auk Birgittu hefur hún rætt við þá Kristin Hrafnsson, Smára McCarthy og Herbert Snorrason, sem hafa allir tengst Wikileaks-síðunni, vegna myndarinnar. Einnig vonast hún til að Julian Assange, stofnandi Wikileaks, komi fram í myndinni. Ehrlich telur að Ísland geti orðið miðstöð frjáls flæðis upplýsinga í heiminum og veit að margir hafa veitt landinu athygli að undanförnu.

„Ég veit að mexíkóskir bændur, sem eru ólöglegir innflytjendur við bandarísku landamærin, ætla að færa netþjón sinn til Íslands til að koma í veg fyrir að bandarísk stjórnvöld hafi hendur í hári þeirra og litlu heimasíðunnar þeirra," segir hún og hefur mikinn hug á að mynda þessa „hliðarsögu" eins og hún kallar hana.

freyr@frettabladid.is