Höfum ekki fengið að framleiða orkuna

„Vissulega snýst þetta um að við náum að semja við Norðurál en samningur knýr ekki álver. Ef við fáum ekki að virkja þá skiptir engu máli hvort fyrir liggur samningur eða ekki.“

Þetta segir Júlíus Jónsson, forstjóri HS Orku, um stöðu mála varðandi orkuöflun vegna fyrirhugaðs álvers Norðuráls í Helguvík.

Í Fréttablaðinu í gær og á laugardag lýstu Vilhjálmur Egilsson, framkvæmdastjóri Samtaka atvinnulífsins, og Katrín Júlíusdóttir iðnaðarráðherra ólíkum sjónarmiðum til framkvæmdarinnar og ástæðna þess að hún er stopp. Í stuttu máli telur Vilhjálmur standa á stjórnvöldum en Katrín segir málið í höndum Norðuráls og orkufyrirtækjanna.

„Við höfum ekki fengið að framleiða eitt einasta kílóvatt vegna Helguvíkur ennþá,“ segir Júlíus en HS orka hugðist afla álverinu orku meðal annars með stækkaðri Reykjanesvirkjun. Fyrir þeim framkvæmdum hefur ekki fengist leyfi en þess var óskað með formlegum hætti í október 2009. Síðan er liðið næstum eitt og hálft ár. Orkustofnun annast leyfisveitingu til virkjana.

Samningur HS orku og Norðuráls frá 2007 er til meðferðar gerðardóms í Svíþjóð en fyrirtækin eru ósammála um túlkun hans og hvort hann sé yfirhöfuð enn í gildi. Málflutningur verður í maí og stefnt að niðurstöðu í júlí.

En Júlíus segir fleira spila inn í. „Við höfum ekki fengið virkjanaleyfi, rammaáætlun um orkunýtingu er ekki tilbúin, nauðsynlegar breytingar á skipulagi Grindavíkur og Hafnarfjarðar vegna Eldvarpa og Krýsuvíkur hafa tekið á fjórða ár og er enn ekki lokið, endalaus flækja var með línurnar á sínum tíma og svo stóðu stjórnvöld fyrir mikilli uppákomu í sumar um eignarhald HS orku. Allt hefur þetta tafið fyrir.“

Norðurál samdi á sínum tíma við bæði HS Orku og Orkuveitu Reykjavíkur um orku. Að mati Júlíusar er óraunhæft annað en að Landsvirkjun komi einnig að málum. „Ég tel að þetta eigi að vera sameiginlegt verkefni orkufyrirtækjanna þriggja. Bæði er líklegra að málin mjakist þá frekar vegna minni áfanga hvers orkufyrirtækis og eins þarf einhver að taka við okkar hlutverki ef svo illa fer að við fáum ekki að virkja.“

bjorn@frettabladid.is