Framhald samstarfsins rætt

Jóhanna Sigurðardóttir forsætisráðherra ætlar að meta stöðu og styrk ríkisstjórnarinnar og möguleika hennar á að koma í gegn veigamiklum málum í kjölfar úrsagnar tveggja þingmanna úr þingflokki Vinstri hreyfingarinnar – græns framboðs.

„Ríkisstjórnin þarf ekki að vera veikari á eftir. Við höfum komið okkar málum í gegn, hingað til að minnsta kosti, þótt þau hafi ekki notið stuðnings allra í Vinstri grænum,“ sagði Jóhanna í gærkvöldi. Aðspurð hvort hún hyggist aðhafast eitthvað til að styrkja stjórnina sagði Jóhanna ekki tímabært að segja til um það. „Fram undan eru mjög stór viðfangsefni þar sem við þurfum að hafa góðan meirihluta fyrir málum. Ekki síst í atvinnumálunum, hvernig við förum að við að glæða hér hagvöxt, fiskveiðistjórnunarmálin og fleiri mál. Ég mun ræða við formann Vinstri grænna sem fyrst til þess að fara yfir þessa stöðu sem upp er komin og hvort ástæða sé til sérstakra viðbragða.“ Fyrr geti hún ekki sagt til um hvort breytingar verði á ríkisstjórninni.

Reyna á að finna fundi þeirra tíma í dag.

Nýjustu vendingar voru ræddar á þingflokksfundi Samfylkingarinnar í gær. Þær, einar og sér, eru ekki taldar skipta höfuðmáli um nauðsyn þess að stjórnarsamstarfið verði tekið til sérstakrar skoðunar; málefnastaðan kallar á það.

Í þingflokki Samfylkingarinnar hefur þeirri skoðun vaxið ásmegin að affarasælast sé að slíta samstarfinu við VG. Telja sumir þingmenn rétt að efna til samstarfs við Sjálfstæðisflokkinn. Meirihluti þingflokksins vill þó að áfram verði unnið með VG en að því gefnu að aukinn kraftur verði settur í ýmis mál og önnur tekin nýjum tökum.

Atvinnuuppbygging er meðal mála í fyrri flokknum og aðildarviðræðurnar við ESB í þeim síðari.

Þá er það hávær krafa í Samfylkingunni að Vinstri græn gangi lengra í breytingum á fiskveiðistjórnunarkerfinu en þau hafa viljað til þessa. Það mál er í raun nýr ásteytingarsteinn milli flokkanna.

Jóhanna Sigurðardóttir kvaðst aðspurð ekki trúa að ástandið á stjórnarheimilinu kallaði á að efnt yrði til kosninga. „Ég trúi ekki að menn vilji fara í kosningar núna þegar við erum í miðjum stórverkefnum eins og að ná kjarasamningum og koma hjólum atvinnulífsins af stað. En það er ekki útilokað að það geti orðið síðar á kjörtímabilinu.“

- bþs / sjá síðu 4