Viðskipti innlent

Seðlabankastjóri býst ekki við miklum áhrifum af ákvörðun ESA

Jón Hákon Halldórsson skrifar
Már Guðmundsson seðlabankastjóri segir áhrif af ákvörðun ESA vera óveruleg.
Már Guðmundsson seðlabankastjóri segir áhrif af ákvörðun ESA vera óveruleg.
Már Guðmundsson seðlabankastjóri segir að flest bendi til þess að ákvörðun ESA, Eftirlitsstofunar EFTA, um að höfða mál gegn Íslandi fyrir EFTA dómstólnum, muni hafa tiltölulega lítil efnahagsleg áhrif fyrir Íslendinga. Fyrir því séu fyrst og fremst tvær ástæður.

„Sú fyrri er náttúrlega sú að hin fjárhagslega áhætta í málinu, á hvort veginn sem það fer, hefur minnkað verulega við það að ljóst er að endurheimtur úr þrotabúinu muni nægja fyrir forgangskröfum og í raun öllum innistæðum," segir Már. Þetta sé hugsanlega spurning um vexti eða einhver málaferli sem kunni að fylgja á eftir. Það verði bara að koma í ljós.

„Hin ástæðan er sú að ég býst við að markaðir og lánshæfismatfyrirtæki hafi nú frekar reiknað með því að þetta færi í þennan farveg. Auðvitað veit maður aldrei varðandi markaði en þeir lúta nú svolítið sálrænum lögmálum til skamms tíma," segir Már. Það gætu því orðið einhver skammtímaáhrif en ekkert sem skipti máli þegar frá líður.

Ákvörðunin skiptir því litlu máli fyrir áætlanir Seðlabanka Íslands. „Ég reiknaði alltaf með því að þetta færi í þennan farveg þannig að þetta breytir í raun engu," segir Már.


Tengdar fréttir

Brunabjallan í gang í Seðlabankanum þegar ákvörðun ESA varð ljós

Um það leyti sem ESA gerði ljósa ákvörðun sína um að stefna Íslandi vegna Icesave-deilunnar var blaðamannafundur í Seðlabankanum þar sem nýtt rit bankans sem ber heitið Fjármálastöðugleiki var kynnt. Þar fór Már Guðmundsson yfir stöðuna og sagði hana hafa styrkst frá því ritið kom síðast út í vor. Már sagði þó að ástandið væri enn viðkvæmt ekki síst í ljósi ástandsins á mörkuðum í Evrópu.

ESA stefnir Íslandi

ESA, Eftirlitsstofnun EFTA, hefur ákveð að stefna Íslandi vegna Icesave deilunnar. Fundur í utanríkismálanefnd hefur verið boðaður klukkan tíu, en hann var boðaður með þriggja kortera fyrirvara. Við segjum nánar frá málinu í dag. Eins og kunnugt er ákváðu Íslendingar að hafna samningum við Breta og Hollendinga fyrr á árinu eftir að Ólafur Ragnar Grímsson skaut málinu til þjóðarinnar.

Niðurstaðan kemur Steingrími ekki á óvart

"Það er ekki hægt að segja að það sem orðið hefur í dag komi á óvart,“ sagði Steingrímur J. Sigfússon fjármálaráðherra á Alþingi í dag um ákvörðun ESA, eftirlitsstofnun EFTA, að höfða mál gegn Íslandi fyrir EFTA dómstólnum.

Engir innistæðueigendur sitja eftir í sárum

Innistæðueigendur, sem höfðu lagt inn á Icesave reikningana, hafa þegar fengið peningana sína greidda til baka. Bjarni Benediktsson, formaður Sjálfstæðisflokksins, vakti máls á þessu á þingfundi í morgun. Eins og kunnugt er hefur ESA, Eftirlitsdómstóll EFTA, ákveðið að stefna Íslandi vegna Icesave reikninganna.

Ólafur hefur áhyggjur af siðferðisvanda stjórnvalda

"Ég hef gríðarlegar áhyggjur af því að þetta mál lendi í höndum stjórnmálamanna sem hafi mikinn siðferðisvanda í málinu," segir Ólafur Elíasson, sem var hluti af InDefence hópnum. Hópurinn barðist gegn fyrstu nauðungarsamningunum í málinu og stóð fyrir undirskriftasöfnun um að þjóðin hafnaði þeim.

Íslendingar verða að þétta vörnina

"Þetta er ekkert sem kemur á óvart í sjálfu sér. Nú er bara að þétta vörnina," segir Jóhannes Karl Sveinsson hæstaréttarlögmaður sem átti sæti í samninganefnd Íslands vegna Icesave málsins. Hann segir að ákvörðunin sem ESA, Eftirlitsstofnun EFTA, tilkynnti í morgun um að höfða mál gegn Íslandi fyrir EFTA dómstólnum sé endapunktur á málsmeðferð sem sé búin að vera í gangi hjá ESA síðan í maí í fyrra.

ESA: Íslendingar verða að tryggja greiðslur að fullu

ESA, Eftirlitsstofnun EFTA, segir að þrátt fyrir að þrjú ár séu liðin frá því að Icesave reikningunum hafi verið lokað sé Ísland enn ekki búið að tryggja greiðslu lágmarkstryggingar upp að 20 þúsund evrum, samkvæmt tilskipun Evrópusambandsins. Tilskipunin leitist við að auka traust neytenda/innstæðueigenda á bankakerfinu ef bankastofnanir verði gjaldþrota. Bankakerfið byggir á trausti og tiltrú neytenda og tilskipunin hefur mikilvægu hlutverki að gegna í því sambandi.

Gjaldeyrishöftin á Íslandi samræmast reglum ESA

Gjaldeyrishöftin á Íslandi eru í samræmi við reglur um EES, samkvæmt nýjum dómi EFTA dómstólsins sem var birtur í dag. Í kjölfar erfiðleika íslenska fjármálakerfisins síðla árs 2008, innleiddu íslensk stjórnvöld reglur um gjaldeyrishöft, þar sem meðal annars var kveðið á um tímabundið bann við innflutningi íslenskra króna. Pálmi Sigmarsson, sem er íslenskur ríkisborgari búsettur í Bretlandi, sótti um undanþágu til Seðlabanka Íslands frá þessu banni, í því skyni að flytja inn til landsins 16,4 milljónir íslenskra króna sem hann hafði keypt á aflandsmarkaði.

Þingfundi frestað

Þingfundi, sem átti að hefjast klukkan hálfellefu í morgun, hefur verið frestað. Ástæða frestunarinnar er ákvörðun ESA, Eftirlitsdómstóls EFTA, um að stefna Íslandi fyrir EFTA dómstólnum vegna Icesave deilunnar. Utanríkismálanefnd Alþingis var boðuð til fundar klukkan tíu til að ræða ákvörðun ESA og stendur sá fundur enn.



Mest lesið


Fleiri fréttir

Sjá meira


×

Mest lesið