Foreldraráð mótmæla sameiningu leikskóla

Foreldraráð leikskólanna Seljaborgar og Seljakots hvetja borgarstjórn til að draga til baka fyrirhuguð áform um sameiningu leikskólanna tveggja. Þetta kemur fram í yfirlýsingu frá foreldrum.

Þar segir að það sé mat foreldranna að undirbúningsvinna þessarar sameiningar hafi ekki verið nægilega vel unnin. Foreldrarnir vilja meina að ekki hafi verið sýnt fram á fjárhagslegan eða faglegan ávinning af sameiningu sem þessari sem réttlætir það rask og óöryggi sem slíkar breytingar myndu fela í sér.

„Þá staðreynd er ekki hægt að fela með innantómum frösum og „klippa-og-líma“ skýrslu,“ eins og segir í tilkynningunni.

Svo segir orðrétt: „Okkur þykir ekki hafa verið nógu vel rökstutt hver raunverulegur sparnaður er sem næst fram með þessari sameiningu. Ef um stórar fjárhæðir væri að ræða þætti okkur þetta skoðunarvert en á meðan engar tölur liggja fyrir um það hve mikið sparast finnst okkur þessi sameining ekki réttlætanleg.

Eins og þetta blasir við okkur er um að ræða sparnað á minna en einu stöðugildi auk einhvers sparnaðar við sameiginleg innkaup og hugsanlega sérkennslu. Í ljósi þess að við drögum í efa að faglegur ávinningur af sameiningu leikskólanna tveggja sé umtalsverður þyrfti fjárhagslegur ávinningur að vera mjög mikill. Eins og áður segir hefur okkur ekki verið sýnt fram á hver fjárhagslegur ávinningur af sameiningunni yrði og gerum við því þá kröfu að við verðum upplýst um það hver hann yrði, ef til kæmi.

Í ljósi þess hve frábært starf hefur verið byggt upp á leikskólum Reykjavíkurborgar á liðnum áratugum er varasamt að grípa til illa ígrundaðra ákvarðana nú þegar mörgum börnum er afskaplega mikilvægt að eiga skjól hjá starfsfólki sem ekki þarf að búa við óvissu né óöryggi.

Foreldraráð leikskólanna beggja lýsa sig reiðubúin til að vinna með stjórnendum leikskólamála hjá Reykjavíkurborg að framtíðarskipulagi skólamála, með sparnað og hagræðingu að leiðarljósi.“