Seldi ríkisbíl og hirti andvirðið sjálfur

Afdrif vörubíls í eigu Fangelsismálastofnunar, sem notaður var á Kvíabryggju, eru meðal atriða sem eru til rannsóknar vegna gruns um misferli fyrrverandi forstöðumanns fangelsisins, Geirmundar Vilhjálmssonar.

Eftir því sem Fréttablaðið kemst næst hafði Fangelsismálastofnun tekið ákvörðun um að selja vörubílinn. Forstöðumaðurinn fyrrverandi tjáði fangelsismálayfirvöldum að bíllinn væri ónýtur og að hann yrði afskráður. Einhverjum mánuðum síðar kom upp úr kafinu að bíllinn hafði verið seldur fyrir á þriðja hundrað þúsund krónur og að nafn forstöðumannsins var undir afsalinu. Við nánari eftirgrennslan kom í ljós að andvirði bílsins hafði runnið til hans.

Ríkisendurskoðun tók málið til athugunar að beiðni Fangelsismálastofnunar og hefur nú lokið athugun á bókhaldi og fjárreiðum forstöðumannsins á tímabilinu janúar til október 2010. Samkvæmt niðurstöðu Ríkisendurskoðunar hafa verið keyptar vörur fyrir rúmlega 1,7 milljónir króna til fangelsisins á ofangreindu tímabili, sem ekki finnast þar.

Á meðal þeirra vara sem teknar voru út en virðast óviðkomandi rekstri fangelsins er eldsneyti fyrir 750 þúsund krónur, hjólbarðar, rafgeymar, farsímar og bílavarahlutir.

„Útgjöld þessi sýnast því ekki tengjast rekstri fangelsisins og er því nauðsynlegt að rannsaka fjárreiður þess nánar," segir í úttekt Ríkisendurskoðunar á fjármálum fangelsisins.

Auk meints fjármálamisferlis forstöðumannsins þótti fangelsismálayfirvöldum sýnt að ekki hefði verið farið í einu og öllu að reglum við stjórnun fangelsisins. Eins og Fréttablaðið greindi frá fyrir nokkru kom í ljós að mótorhjól, bifreiðar og fjórhjól í eigu fanga höfðu verið geymd í fangelsinu um eitthvert skeið. Fangarnir höfðu tækin til umráða. Þau hafa verið fjarlægð af staðnum.

Fangelsismálastofnun kærði forstöðumanninn til Ríkissaksóknara eftir að upp kom rökstuddur grunur um að hann hefði misnotað aðstöðu sína með því að taka út ýmsan varning í nafni fangelsisins til eigin nota, auk annars misferlis.

Grunur leikur á að meint misferli hafi átt sér stað um nokkurra mánaða skeið. Forstöðumaðurinn var leystur frá störfum í nóvember á síðasta ári.

Fangelsismálayfirvöld hafa kært forstöðumanninn til Ríkissaksóknara. Ríkissaksóknari fól Lögreglustjóra höfuðborgarsvæðisins frekari meðferð málsins í desember og stendur rannsóknin nú yfir.