Mannskæð átök í kjölfar mótmæla

Þvert ofan í blátt bann við mótmælum sem Moammar Gaddafí Líbíuleiðtogi hefur sett héldu hundruð mótmælenda út á götur í fjórum borgum landsins í gær og á miðvikudag.

Her landsins tók harkalega á mótmælunum og stuðningsmenn Gaddafí héldu einnig út á götur til að slást við mótmælendur. Tugir manna eru sagðir hafa látið lífið í þeim átökum, bæði á miðvikudagskvöld og í gær.

Gaddafí hefur stjórnað Líbíu með harðri hendi í meira en fjóra áratugi og hefur heljartök á fjölmiðlum og allri stjórnmálaumræðu í landinu.

„Í dag rufu Líbíubúar múr óttans. Nú er ný dögun,“ sagði Faiz Jibril, útlægur leiðtogi stjórnar­andstöðunnar.

Í Barein sendu stjórnvöld öflugt herlið með fjölda skriðdreka til þess að rýma Perlutorgið í höfuðborginni Manama í gærmorgun. Fyrir dögun hafði lögregla beitt kylfum og táragasi á mótmælendur, sem sumir hverjir voru sofandi á torginu. Að minnsta kosti fjórir létu lífið.

Stjórnvöld höfðu haldið aftur af sér dögum saman og látið mótmælendur óáreitta síðan í byrjun vikunnar, þegar átök kostuðu þrjá menn lífið. Við það tvíefldust mótmælendur, sem krefjast þess að konungur og valdastétt landsins hætti að mismuna fólki eftir trúarbrögðum og gefi möguleika á lýðræðislegri vinnubrögðum.

Í Sana, höfuðborg Jemens, kom einnig til átaka í gær milli mótmælenda og stuðningsmanna stjórnarinnar, sem sveifluðu kylfum og hnífum. Lögreglan reyndi að stilla til friðar en beitti sér aðallega gegn stjórnarandstæðingum. Vitni sögðu bifreiðir merkta borginni hafa verið notaðar til þess að flytja bæði kylfur og grjót til stuðningsmanna stjórnarinnar.

Mótmælin í Sana hafa staðið yfir í viku og krefjast mótmælendur þess að Ali Abdullah Saleh forseti láti af embætti eftir 32 ára valdatíð. Óánægjan er sögð stafa bæði af mikilli fátækt í landinu og spillingu stjórnvalda.

Mótmælendur létu einnig í sér heyra í Jórdaníu í gær og jafnvel í Írak brutust út mótmæli í gær í borginni Basra, þar sem hundruð manna kröfðust afsagnar ríkisstjórans.gudsteinn@frettabladid.is