Öskjuhlíðaskóli og Safamýraskóli sameinaðir

Menntaráð samþykkti á fundi sínum í dag að sameina starfsemi Safamýrarskóla og Öskjuhlíðarskóla. Tillögu þess efnis verður beint til borgarráðs. Samkvæmt tillögunni er gert ráð fyrir því að nýr sameinaður sérskóli starfi í húsnæði Öskjuhlíðarskóla og taki til starfa næsta haust. Fram að þeim tíma undirbúi starfshópur starfsemi nýja skólans með stefnumótun og verkáætlun sem taki til breytinga á húsnæði, starfsmannahaldi og upplýsingamiðlun til allra hagsmunaaðila.

Menntaráð samþykkti jafnframt að nýr sameinaður sérskóli skuli sinna ráðgjafarhlutverki gagnvart almennum grunnskólum um kennslu nemenda með þroskahömlun. Einnig að hann hafi umsjón með því að stofnað verði til svokallaðra þátttökubekkja í stað hefðbundinna sérdeilda í fjórum almennum grunnskólum í borginni fyrir nemendur með þroskahömlun.

Í greinargerð með tillögum menntaráðs kemur m.a. fram að Öskjuhlíðarskóli og Safamýrarskóli, sem byggðir voru 1974 og 1982, hafi verið útbúnir fyrir aðra nemendahópa en nú eru í skólunum. Eins sé réttur fatlaðra barna til skólagöngu í heimaskóla orðinn skýr í lögum og nánast allir nemendur með sambærilegar þarfir og voru í sérskólum áður séu nú í almennum grunnskólum með stuðningi.

Vinna við að stofna einn öflugan sérskóla í Reykjavík á sér nær áratuga langa sögu. Í stefnu fræðsluráðs Reykjavíkur um sérkennslu frá árinu 2002 var t.d. lagt til að Öskjuhlíðar- og Safamýrarskóli yrðu sameinaðir og að nýr sérskóli þjónaði fjölfötluðum og mikið þroskahömluðum nemendum. Sú tillaga var m.a. studd þeim rökum að þannig yrði til einn öflugur ráðgjafarskóli á þessu sviði, vinnubrögð yrðu samhæfð og ráðgjöfin öflugri.

Starfshópur sem skilaði tillögum í júní 2008 lagði einnig til að byggður yrði nýr sérskóli sem kæmi í stað beggja þeirra skóla sem fyrir væru. Sú tillaga hefur ekki komið til framkvæmda enda hefur þrengt mjög að í rekstri borgarinnar. Samþykkt menntaráðs nú er tekin á grundvelli vinnu tveggja starfshópa sem störfuðu á nýliðnu ári og höfðu það verkefni að vinna áætlun um sameiningu sérskólanna tveggja.

Í Öskjuhlíðarskóla eru nú 80 nemendur og í Safamýrarskóla 10 nemendur. Búast má við að nemendur Safamýrarskóla verði aðeins 6 á næsta skólaári.