Krabbameinssjúk móðir: "Fékk djöfullegt bréf frá Tryggingastofnun"

„Ég hef svo miklar áhyggjur af fjármálum að ég er byrjuð að taka róandi. Af og til á milli kvíðakasta yfir þessu man ég eftir þessum lífshættulegu veikindum mínum, áhyggjur fyrir þeim komast ekki með tærnar þar sem fjármálaáhyggjurnar hafa hælana," segir Rakel Sara Magnúsdóttir, 28 ára tveggja barna móðir sem greindist með eitlakrabbamein árið 2004.

Hún fékk beinmerg frá litla bróður sínum á síðasta ári en það dugði ekki til. Krabbameinið er komið aftur og Rakel Sara er í enn einni krabbameinsmeðferðinni.

Hún hefur þegið bætur frá Tryggingastofnun þar sem hún hefur verið óvinnufær vegna veikinda. Nú þarf hún hins vegar að endurgreiða hluta bótanna og fjárhagsstaðan verri en nokkru sinni fyrr.

„Fyrir nokkrum dögum fékk ég djöfullegt bréf frá Tryggingastofnun sem er að rukka mig um nokkur hundruð þúsund vegna ofgreiddra bóta. Þessar svokölluðu ofgreiddu bætur voru nógu ömurlegar og hvað þá eftir að búið er að lækka þær um 70 þúsund," segir Rakel Sara á bloggsíðu sem hún heldur úti og segir frá baráttu sinni við krabbameinið.

Samkvæmt bréfinu frá Tryggingastofnun á hún að endurgreiða 82 þúsund á mánuði næstu átta mánuði. Mánaðarlegar bætur hennar frá stofnuninni eru hins vegar aðeins 80 þúsund. Að átta mánuðum liðnum á hún því að vera búin að greiða Tryggingastofnun 16 þúsund krónum meira en hún hefur fengið í bætur á tímabilinu.

„Ég er greinilega að bugast núna"

„Dagurinn sem bréfið kom, byrjaði ég á því að kasta upp og leggjast upp í rúm og hágráta. Ég hef ekki grátið síðan ég bugaðist þarna einu sinni í mergskiptunum, ég er greinilega að bugast núna og get ekkert gert í því," segir hún.

Rakel Sara hafnaði viðtali þegar blaðamaður hafði samband við hana, hún sagðist búin andlega en velkomið væri að vitna í bloggið hennar.

Skortir skilning

Hún er nýlegar byrjuð aftur í krabbameinsmeðferð og fékk stóran frumuskamt fyrir rúmri viku. „Ég er ekki orðin alvöru veik en það er að skella á núna. Ég er búin að vera svo lengi í þessu veikindum að mér finnst ég oft ekki fá skilning á því að ég er lífshættulega veik. Það er eins og sumt fólk sé bara búið að gleyma því að ég er veik af því að ég lít vel út og er með hár á hausnum," segir hún.

Dagpeningar möguleg skýring

Í samtali við fréttastofu tekur Rakel Sara fram að hún skilji ekki af hverju Tryggingastofnun rukki hana um endurgreiðslu, en dettur helst í hug að dagpeningar sem hún hafi fengið þegar hún var í beinmergsskiptunum hafi orðið til þess að stofnunina telur hana hafa fengið of mikið greitt. Þeir dagpeningar hafi þó komið frá Tryggingastofnun sjálfri.

Hún hefur þegar sett sig í samband við Tryggingastofnun vegna bréfsins til að komast til botns í málinu.

Rakel Sara segir erfitt að þiggja fjárhagsaðstoð og líði hreinlega eins og „aumingja" en eftir hvatningu frá lesendum bloggsíðunnar sem sögðust vilja leggja henni lið fjárhagslega hefur Rakel Sara birt þar reiknisnúmerið sitt sem er 0117-26-7989 og kennitalan 080583-4949.

Bloggsíða Rakelar Söru er hér.

Um ellefu þúsund lífeyrisþegar fengu ofgreitt frá Tryggingastofnun ríkisins, samkvæmt endurreikningi og uppgjöri bóta fyrir síðasta ár.

Þar af þurfa um 3 þúsund lífeyrisþegar að endurgreiða 100 þúsund krónur eða meira.