Ríkissaksóknari: „Mér finnst þetta forkastanlegt“

„Mér finnst þetta forkastanlegt,“ segir Valtýr Sigurðsson, ríkissaksóknari, um kæru Hannesar Smárasonar á hendur honum og Helga Magnúsi Gunnarssyni, saksóknara efnahagsbrotadeildar ríkislögreglustjórans.

Það var Fréttablaðið sem greindi frá því í dag að Hannes hefði kært þá fyrir brot gegn þagnarskyldu í opnberu starfi. Samkvæmt upplýsingum Fréttablaðsins er aðdragandi þessa máls með þeim hætti að Helgi Magnús sendi ríkissaksóknara tölvupóst í mars 2010, þess efnis að fulltrúi tiltekins kröfuhafa hefði farið fram á að fá afhent afrit af gögnum sem embætti Skattrannsóknarstjóra hafði aflað með húsleit, meðal annars hjá FL Group.

Gögnin hafði embættið sent saksóknara efnahagsbrotadeildar RLS og tengdust þau viðskiptum FL Group með flugfélagið Sterling. Fulltrúinn sem bað um afritið kvaðst álíta að aðgerðir stjórnar og forstjóra FL Group hefðu valdið tilteknum hluthöfum tjóni og íhuguðu þeir að leita réttar síns.

Í tölvupóstinum leitaði saksóknari efnahagsbrota óformlegs álits ríkissaksóknara á afhendingu gagnanna. Ríkissaksóknari kvaðst í svari ekki hafa forsendur til að meta málið, en mælti ekki gegn afhendingu að tilteknum atriðum uppfylltum.

Saksóknari efnahagsbrota RLS afhenti síðan fulltrúanum gögnin. Upplýsingar úr þeim birtust síðar í Viðskiptablaðinu í ítarlegri úttekt blaðsins á viðskiptafléttu Sterling. Kærði lögmaður Hannesar ríkissaksóknara og saksóknara efnahagsbrota í framhaldi af því, hinn fyrrnefnda fyrir samráð um afhendingu gagnanna og hinn síðarnefnda fyrir afhendingu þeirra.

Þann 8. nóvember greindi Valtýr svo dómsmálaráðuneytinu frá kærunni og að hann teldi rétt, vegna þessara alvarlegu ásakanna, og kröfu um að hann víki sæti við meðferð þess, að verða við því.

Með bréfi ráðuneytisins dagsettu 29. desember síðastliðinn var Guðjón Ólafur Jónsson, hæstaréttarlögmaður, settur til að gegna embætti ríkissaksóknara í þessu tiltekna máli. Hann skal einnig meta hvort það sé tilefni til þess að kæra Bryndísi Kristjánsdóttur, skattrannsóknarstjóra, fyrir að hafa afhent ríkislögreglustjóra gögnin en í kærunni er það lagt í mat ríkissaksóknara að ákveða hvort sú háttsemi falli undir tiltekin ákvæði hegningarlaga.

Guðjón Ólafur mun einnig ákveða hvort þörf sé á lögreglurannsókn en málið er ekki komið í þann farveg.

Verjandi Hannesar er Gísli Guðni Hall hrl.