Innlent

Halldór væntanlegur til landsins

Halldór Kristjánsson
Halldór Kristjánsson Mynd/Vilhelm Gunnarsson

Sérstakur saksóknari yfirheyrði í gær sjö starfsmenn gamla Landsbankans vegna rannsóknar á meintri stórfelldri markaðsmisnotkun fyrir hrun. Nokkrir voru handteknir og að lokum voru tveir leiddir fyrir dómara. Tugmilljarðar viðskipta eru undir í rannsókninni. Fyrrverandi bankastjóri Landsbankans kemur til landsins á næstu dögum vegna rannsóknarinnar.

Sigurjón Þ. Árnason, fyrrverandi bankastjóri, var einn hinna yfirheyrðu, líkt og Elín Sigfúsdóttir, sem var forstöðumaður á fyrirtækjasviði gamla bankans.

Steinþór Gunnarsson, forstöðumaður verðbréfamiðlunar, Yngvi Örn Kristinsson, framkvæmdastjóri verðbréfasviðs, og Ívar Guðjónsson, forstöðumaður eigin fjárfestinga, voru einnig meðal yfirheyrðra. Samkvæmt heimildum Fréttablaðsins á það einnig við um tvo starfsmenn eigin fjárfestinga: Júlíus Steinar Heiðarsson og Sindra Sveinsson. Enginn þeirra starfar í Nýja Landsbankanum.

Ólafur Þór Hauksson, sérstakur saksóknari, sagði í samtali við fréttastofu á ellefta tímanum í gærkvöldi að farið yrði fram á gæsluvarðhald yfir tveimur mönnum. Hann gaf ekki upp nöfn þeirra. Skömmu síðar komu Sigurjón og annar maður fyrir dómara í Héraðsdómi Reykjavíkur. Af því loknu var þeir leiddir á brott af lögreglumönnum. Sigurjón vildi ekki tjá sig við fréttamenn um málið.

Halldór J. Kristjánsson, fyrrverandi bankastjóri, sem er búsettur í Kanada, hefur verið boðaður til yfirheyrslu og er væntanlegur til landsins eftir helgi, að því er fram kemur í Fréttablaðinu í dag.




Tengdar fréttir

Sjö færðir í skýrslutöku - grunur um stórfellt auðgunarbrot

Í tengslum við rannsóknir embættis sérstaks saksóknara á kaupum Landsbanka Íslands á hlutbréfum útgefnum af bankanum og lánveitingum bankans til hlutabréfakaupa fóru fram húsleitir á þremur stöðum í dag á höfuðborgarsvæðinu samkvæmt tilkynningu frá Sérstökum saksóknara. Þar kemur fram, eins og Vísir greindi frá, að sjö manns voru á sama tíma færðir til skýrslutöku.

Yfirheyrslur enn í fullum gangi

Yfirheyrslur enn í fullum gangi hjá sérstökum saksóknara. Samkvæmt fréttamanni Vísis sem er fyrir utan húsnæði sérstaks saksóknara hefur enginn farið inn né út úr húsinu. Fyrrum bankastjórarnir Sigurjón Árnason og Elín Sigfúsdóttir hafa sést utanfrá inn í húsinu.

Sigurjón fór í fylgd lögreglumanna

Sigurjón Árnason, fyrrverandi bankastjóri Landsbankans, yfirgaf húsakynni embættis sérstaks saksóknara í lögreglufylgd rétt fyrir klukkan ellefu í kvöld. Hvorki Sigurjón né Sigurður G. Guðjónsson, lögmaður hans, vildu tjá sig við fjölmiðla um rannsókn sérstaks saksóknara sem snýr að stórfelldri markaðsmisnotkun Landsbankans.

Farið fram á gæsluvarðhald yfir tveimur

Ólafur Þór Hauksson, sérstakur saksóknari, segir að farið verði fram á gæsluvarðhald yfir tveimur einstaklingum í tengslum við rannsókn embættisins sem snýr að stórfelldri markaðsmisnotkun Landsbankans. Hann vill ekki gefa upp hverjir það eru né hversu margir munu gista fangageymslur í nótt. Skömmu fyrir klukkan ellefu í kvöld yfirgaf Sigurjón Árnason, fyrrverandi bankastjóri Landsbankans, húsakynni embætti sérstaks saksóknara í lögreglufylgd. Hann vildi ekki tjá sig um málið við fréttamenn.

Mest lesið


Fleiri fréttir

Sjá meira


×

Mest lesið