Öflug sprenging í japönsku kjarnorkuveri

Öflug sprenging varð í kjarnorkuveri í borginni Fukushima í Japan í morgun sem talin er ógna öryggi landsins. Mikinn reyk leggur nú frá kjarnorkuverinu og hafa japönsk yfirvöld staðfest að leki hafi komið þar upp.

Fjórir starfsmenn kjarnorkuversins slösuðust í sprengingunni en ekki er vitað hvað olli henni.

Í gær var sagt frá því að kælikerfi kjarnorkuversins hefði laskast í jarðskjálftanum.

Starfsmennirnir unnu að viðgerð á kælikerfinu þegar sprenging varð. Íbúar í grennd við kjarnorkuverið voru fluttir á brott í gær en fréttir af sprengingunni eru enn nokkuð óljósar.

Samkvæmt upplýsingum frá Sendiráði Íslands í Japan er nú búið að ná í 56 af þeim 60 íslendingum sem taldir eru vera á svæðinu. Starfsmenn Sendiráðsins voru að í alla nótt og ætla að halda áfram þar til búið er að ná í alla. Tala látinna fer hækkandi í kjölfar jarðskjálftans.

Nú er talið að minnst þrettán hundruð manns hafi týnt lífi í skjálftanum sem er sá fimmti stærsti í sögunni síðustu hundrað árin. Fylgst verður með gangi máli í fréttum okkar í dag og á Vísi.is