Perlan þótti ógn á sínum tíma - Harpan alveg meinlaus

Þær áhyggjur sem fram komu í fjölmiðlum í gær um samkeppni frá Hörpunni eru fullkomlega óþarfar. Íslenskum ráðstefnu- og viðburðahöldurum stafar ekki ógn af Hörpunni - heldur felur hún miklu frekar í sér tækifæri fyrir þá og aðra ferðaþjónustuaðila.

Þetta kemur fram í tilkynningu sem Steinunn Birna Ragnarsdóttir, tónlistarstjóri Hörpunnar, hefur sent frá sér í tilefni af fréttaumfjöllun þar sem fram hefur komið að rekstraraðilar veislusala hafa áhyggjur af afkomu sinni þegar þeir þurfa að keppa við glæsihýsið Hörpuna.

Hún segir að opnun Perlunnar hafi á sínum tíma valdið samskonar áhyggjum, og að þá hafi margir veitingamenn talið að hún myndi taka yfir allan markaðinn. „Þær áhyggjur reyndust fullkomlega óþarfar eins og menn vita," segir Steinunn.

„Ég tel að þessar áhyggjur einskorðist við einhverja örfáa aðila. Margir reyndir aðilar úr ráðstefnu- og veitingageiranum hafa rætt við okkur á þeim nótum að þeir fagni tilkomu Hörpu og telja að hún muni fyrst og fremst stækka markaðinn. Tilkoma hennar eigi eftir að koma Íslandi á kortið sem áfangastað fyrir ráðstefnur og stóra viðburði. Það er ljóst að lágt gengi krónunnar gerir Ísland að afar samkeppnishæfum áfangastað um þessar mundir. Það má því segja að opnun Hörpunnar komi á besta tíma fyrir ferðaþjónustuna. Ekki síst hvað varðar ráðstefnuhald," segir Steinunn.

Hér meðfylgjandi er brot úr síðasta þætti Spaugstofunnar þar sem þeir félagar setja á svið opnunarhátíð Hörpunnar en niðurskurður á tónlistarkennslu hafði ófyrirséðar afleiðingar fyrir hana, eftir því sem grínararnir í Spaugstofunni komast næst. Smellið á tengilinn hér að ofan til að sjá brot úr þættinum.