Skerðing á þjónustu Strætó staðfest í borgarráði

Meirihluti Besta flokks og Samfylkingar felldi tillögu Vinstri grænna um að koma í veg fyrir þjónustuskerðingu Strætó bs á borgarráðsfundi í dag þrátt fyrir að allmargir fulltrúar Besta flokksins, þar með talinn borgarstjórinn sjálfur hefðu fullyrt að þeir myndu gera allt sem í þeirra valdi stæði til að tryggja óbreytta þjónustu.

Þetta kemur fram í tilkynningu sem Sóley Tómasdóttir hefur sent frá sér.

Á fundi borgarráðs lagði hún fram eftirfarandi bókun:

„Fyrsta skref meirihluta Besta flokks og Samfylkingar í átt að eflingu almenningssamgangna er að skerða þjónustu Strætó bs. Ákvörðunin er í beinni andstöðu við stefnu Umhverfis- og samgönguráðs borgarinnar sem fer með stefnumótunarhlutverk í málaflokknum og rýrir því ekki aðeins trúverðugleika flokkanna tveggja, heldur einnig stjórnkerfis borgarinnar og hlutverk fagráða.

Sérstaklega veikir þessi afgreiðsla trúverðugleika borgarráðsfulltrúa Besta flokksins sem hafa látið til sín taka með róttækum hætti í aðgerðum vegna eignarhalds á auðlindum og orkufyrirtækjum en treysta sér ekki til að grípa til aðgerða þegar þeir eru í aðstæðum til að breyta.

Þjónustuskerðing hjá Strætó mun hafa umtalsverð áhrif á fjárhag, umhverfi og möguleika borgarbúa til virkrar þátttöku í samfélaginu og er það miður að meirihlutinn skuli ekki hafa dug í sér til að koma í veg fyrir þau."

Á sama fundi lögðu borgarráðsfulltrúar Vinstri grænna og Sjálfstæðisflokks fram tillögu um að Innri endurskoðun gerði úttekt á þeim vinnubrögðum sem leiddu til skerðingarinnar, enda kannast fulltrúar meirihlutans ekki við að hafa staðið að henni auk þess sem henni sést hvergi staður í fundagerðum stjórnar SSH sem er hinn formlegi vettvangur til slíkrar ákvarðanatöku.

Tillagan fylgir hér að neðan:

„Ekki hafa fengist nein svör við því hvar ákvörðun um hagræðingu hjá Strætó bs var tekin. Borgarstjóri og formaður borgarráðs segjast ekki hafa komið að ákvörðuninni og henni sést hvergi staður í fundargerðum stjórnar Sambands sveitarfélaga á höfuðborgarsvæðinu, auk þess sem hún varð að veruleika þrátt fyrir sameiginlega bókun alls umhverfis- og samgönguráðs um að ákvörðunin skyldi tekin til baka. Þar sem þetta fyrirkomulag og þessi óljósu svör samræmast í engu sjálfsagðri kröfu um gagnsæi og rekjanleika ákvarðana leggja borgarráðsfulltrúar Vinstri grænna og Sjálfstæðisflokks til að óskað verði eftir úttekt innri endurskoðunar á þessu afmarkaða máli sem og boðleiðum milli sveitarfélaga, fagráða og fyrirtækisins og leggi niðurstöður sínar fyrir borgarráð hið fyrsta."