Vill D-vítamínbæta matvörur

Prófessor í næringarfræði vill að D-vítamín verði sett í matvæli eins og mjólk, smjör og olíur til að sporna gegn D-vítamínskorti landsmanna. Laufey Steingrímsdóttir, prófessor í næringarfræði við Háskóla Íslands, hélt erindi á Matvæladegi Matvæla- og næringarfræðafélags Íslands síðdegis. Þar ræddi hún D-vítamínskort landsmanna. Meirihlutinn fær ekki ráðlagðan dagskammt af D-vítamíni og beinþynning og beinkröm eru orðin talsvert vandamál hér á landi.

„Það er ekki nóg að borða bara hollan mat og halda að þá sé málið í lagi. D-vítamínið er bara í örfáum fæðutegundum eins og í feitum fiski og lýsi. Þeir sem ekki þá borða feitan fisk nánast á hverjum einasta degi fá ekki nægilegt D-vítamín úr fæðunni einni saman," segir Laufey.

Þá segir Laufey aukna sólvarvarnarnotkun landsmanna auka á vandann. Til að sporna við D-vítamínskorti þá vill Laufey að matvæli verði D-vítamínbætt. Til að mynda mjólk eins og gert er í Bandaríkjunum og gefist hefur ágætlega.

„Það kemur aldrei í staðinn fyrir að taka lýsi. Það kemur aldrei í staðinn fyrir að taka D-vítamín sem allir þurfa að gera eigi að síður. Það tryggir svona þeim sem að sleppa þessu lágmarksstatus. Það kemur þá í veg fyrir að það sé skortur á D-vítamíni. Ég held að það sé mikið atriði þess vegna að svona algeng matvæli, þetta verður að velja varlega svo þetta sé ekki sett út um allt, en eins og í mjólk, olíur, smjörlíki, feitmeti, slíkt að það sé settur ákveðinn skilgreindur skammtur af D-vítamíni svona til að tryggja lágmarksstatusinn," segir Laufey.