Alþingi á ekki að gerast dómari í eigin sök

Fyrsti formlegi fundur stjórnlagaráðs var haldinn í dag en ráðið hefur það verkefni að undirbúa frumvarp um breytingar á stjórnarskránni. Ómar Ragnarsson, aldursforseti ráðsins, setti fundinn en gert er ráð fyrir því að ráðið starfi í tvo til fjóra mánuði.

Stjórnlagaráðsfulltrúar vilja að frumvarpið verði sett beint í þjóðaratkvæðagreiðslu áður en Alþingi tekur afstöðu til málsins. „Þetta helgast af hagnýtum rökum að stjórnarskrá sérhvers lands fjallar meðal annars um Alþingi, t.d. um fjölda alþingismanna og þá á Alþingi ekki að gerast dómari í eigin sök og taka efnsilega afstöðu til slíkra hluta og drátturinn sem hefur orðið á stjórnarskránni frá 1944 hefur einmitt stafað af þessari gömlu sjálftöku hugsun," segir Þorvaldur Gylfason, stjórnlagaráðsfulltrúi.

„Ef við getum komið fram með tillögu að stjórnarskrá sem getur nýst Íslendingum í framtíðinni þá er mér alveg slétt sama hvort umboð okkar sé sterkt eða veikt. Það er verkið sem skiptir máli," segir Katrín Oddsdóttir, stjórnlagaráðsfulltrúi.

Á fundinum í dag var lögð fram 700 blaðsíðna skýrsla stjórnlaganefndar sem meðal annars hafði það hlutverk að leggja fram hugmyndir um breytingar á stjórnarskránni. Í þeirri vinnu var tekið mið af þeim viðhorfum sem komu fram á Þjóðfundi á síðasta ári.

Nefndin leggur fram fjölmarga valkosti um breytingar þar á meðal að minnihluti Alþingis geti krafist þjóðaratkvæðagreiðslu sem og ákveðinn hluti þjóðar. Þá setur nefndin fram þann valkost að framkvæmda- og löggjafarvald verði aðskilið þannig að ráðherrar sitji ekki á Alþingi. Ennfremur að sjálfstæði dómstóla verði styrkt og að kjördæmaskipan verði endurskoðuð.

Það var hátíðarstemning á fyrsta fundi stjórnlagaráðs í dag en stjórnlagaráðsfulltrúar ætla að ljúka öllum fundum með hópsöng.