Bjarni Ben: "Hann er góður vinur minn, Davíð Oddsson"

Bjarni Benediktsson, formaður Sjálfstæðisflokksins, segist ekki upplifa skrif Morgunblaðsins þannig að Davíð Oddsson, fyrrverandi formaður flokksins, sé að anda ofan í hálsmálið á honum á degi hverjum.

Bjarni var kallaður "vikapiltur Steingríms J." í leiðara Morgunblaðsins 4. febrúar á þessu ári eftir að hann studdi Icesave-samninga Lee Buchheits. En þar stóð: "Formaður Sjálfstæðisflokksins hefur skyndilega ákveðið að verða vikapiltur Steingríms J. í málinu. Ekki hefur fengist nein haldbær skýring á þeirri breytingu á afstöðu hans og hvers vegna hann ákveður að gefa landsfundi flokks síns langt nef. Sjálfstæðismenn eru agndofa."

Bjarni segist ekki erfa þessa árás fyrrverandi formanns á sig. "Við vorum ósammála í þessu máli en ég ber mikla virðingu fyrir honum sem stjórnmálamanni og sem persónu. Hann er góður vinur minn, Davíð Oddsson," segir Bjarni.

Bjarni segist ræða af og til við Davíð, en ráðfærir hann sig við fyrrverandi formann? "Við ræðum einstaka sinnum saman," segir Bjarni og segist hafa síðast rætt við Davíð fyrir nokkrum vikum, en vill ekki gefa upp um hvað. Sjá bút úr Klinkinu þar sem Bjarni ræðir um gagnrýni Davíðs og samskipti þeirra tveggja í myndskeiðinu hér fyrir ofan. Viðtalið við Bjarna í heild sinni má nálgast hér.thorbjorn@stod2.is