Skemmtilegri í 25 ár

Þegar Stöð 2 hóf útsendingar 9. október 1986 - fyrst frjálsra og einkarekinna sjónvarpsstöðva á Íslandi - hafði þjóðin í reynd ekki fengið að kynnast til fulls áhrifamætti og notagildi þessa magnaða miðils, sjónvarpsins. Það mun ekki hafa skort efasemdir um að slíkt framtak væri yfirhöfuð á færi einkaaðila og að sjónvarpsrekstur gæti staðið undir sér sem fyrirtæki á okkar smáa markaði.

En frumherjarnir voru stórhuga og settu stefnuna á alhliða sjálfstæða sjónvarpsstöð, sem byði upp á fyrsta flokks sjónvarpsefni af öllu tagi. Þeir töldu einfaldlega að stöðin myndi ekki hljóta nægilega útbreiðslu sem áskriftarstöð á meðal íslensku þjóðarinnar ef markið væri sett lægra.

Allar götur síðan hefur það verið meginmarkmið stöðvarinnar að skemmta þjóðinni. Stytta henni stundir heima í stofu með því að bjóða upp á vandlega valda blöndu af vinsælasta erlenda skemmtiefninu, bestu íslensku dagskrárgerð sem völ er á, vönduðu barnaefni og síðast en ekki síst fréttum og fréttatengdri umfjöllun, á mannamáli, um fólkið í landinu fyrir fólkið í landinu. Fréttastofa Stöðvar 2 hefur staðið vaktina frá fyrsta starfsdegi stöðvarinnar og er hún gott dæmi um þau þrekvirki sem unnin hafa verið á stöðinni.

En brautryðjendaverk Stöðvar 2 eru sannarlega margvísleg. Án hennar þyrftum við ef til vill enn að þola sjónvarpslaus fimmtudagskvöld og í ofanálag heilan mánuð af stillimynd í júlí. Við þetta má líka bæta að Stöð 2 var fyrsta stöðin til að bjóða upp á dagskrá allan sólarhringinn, talsett barnaefni, í morgundagskrá um helgar, sérstaka hliðarstöð helgaða bíómyndum, plúsrásir, stafræna útsendingu, háskerpuútsendingu, þrívíddarútsendingu, frelsi til að horfa á þætti þegar best hentar og svo mætti lengi telja. Það er bjargföst trú mín að Stöð 2 verði áfram leiðandi í framþróun íslensks sjónvarps og tengdra miðla.

En þrátt fyrir þessa jákvæðu og nauðsynlegu nýjungagirni, allt sem gengið hefur á, eigendaskipti og mannabreytingar, höfum við aldrei misst sjónar af því sem mestu máli skiptir; að bjóða áskrifendum ætíð upp á framúrskarandi dagskrá. Og við gleymum því heldur aldrei að það eru áskrifendur sem ráða ferðinni og ákveða á endanum dagskrá stöðvarinnar. Það gera þeir með frelsi sínu og valdi til að velja og hafna því sem við höfum upp á að bjóða. Það eru líka áskrifendur Stöðvar 2, ásamt auglýsendum og framúrskarandi lista- og hæfileikafólki, sem eiga heiðurinn af öllu því frábæra innlenda dagskrárefni sem Stöð 2 hefur boðið upp á. Áskrifendur eru þar með einn helsti bakhjarl kvikmynda- og þáttagerðar í landinu og þeirra framfara sem átt hafa sér stað í sjónvarpsþáttagerð á Íslandi.

Þessu gleymum við aldrei og er okkur því efst í huga á þessu stórafmæli Stöðvar 2 - þakklæti. Þakklæti til alls þess starfsfólks, skemmtikrafta og listafólks sem gætt hefur stöðina lífi, þakklæti til auglýsenda fyrir þá tiltrú sem þeir hafa sýnt stöðinni og síðast en ekki síst þakklæti til áskrifenda sem gert hafa Stöð 2 skemmtilegri í 25 ár - og munu áfram gera um ókomna tíð því þetta er ekki bara smellið slagorð, heldur loforð. Þess vegna horfum við björtum augum á komandi vetur og langa framtíð.