Hætt við ráðningu upplýsingafulltrúa vegna sparnaðar

Forsætisráðuneytið hætti við að ráða upplýsingafulltrúa vegna sparnaðar. Fyrr á þessu ári var staðan auglýst og sóttu 37 um hana. Ekki hefur verið tekin endanleg ákvörðun um hvort eða hvenær starfið verður auglýst að nýju, að því er fram kemur í svari Ágústs Geirs Ágústssonar, skrifstofustjórar, við fyrirspurn Vísis.   

Í svari skrifstofustjórans segir að ákvörðun um að falla frá ráðningu í starfið að svo stöddu sé meðal annars liður í viðleitni ráðuneytisins til að ná aðhaldsmarkmiðum í rekstri á árinu. „Auk þess hafa starfsmannamál Stjórnarráðsins verið til skoðunar og umfjöllunar á undanförnum vikum m.a. í tengslum við breytingar sem miða að því að auka aðhald og sveigjanleika í starfsmannahaldi innan Stjórnarráðsins. Þótti jafnframt rétt að bíða niðurstöðu í því máli“

Þegar ríkisstjórn Samfylkingar og VG var mynduð gegndi Kristján Kristjánsson stöðu upplýsingafulltrúa í forsætisráðuenytinu. Hann fór síðar til Landsbankans og þá tók Einar Karl Haraldsson, fyrrverandi ritstjóri og aðstoðarmaðuar Össurar Skarphéðinssonar, tímabundið við sem upplýsingafulltrúi. Ráðuneytið hefur verið án upplýsingafulltrúa um nokkurt skeið.