Morðtilraunin náðist á myndband

„Þetta eru leiðindaatvik sem geta komið upp hvar sem er og það væri betra ef þau væru færri," segir Margeir Margeirsson, eigandi Monte Carlo og Mónakó á Laugavegi í Reykjavík.

Karlmaður var stunginn lífshættulega í hálsinn svo slagæð rofnaði á veitingastaðnum Monte Carlo um miðnætti. Tilkynnt var um mann sem gekk þar berserksgang, vopnaður hnífi og ógnaði öllum innandyra. Maðurinn sem var stunginn er nú í öndunarvél á gjörgæsludeild.

Margeir segist ekki hafa verið á staðnum en hafi komið stuttu eftir miðnætti og skoðað myndbandsupptökur af atvikinu. „Þar sést maður koma þarna inn og er með uppsteit og er vísað út. Svo kemur hann aftur rétt fyrir klukkan tólf og þá er verið að vísa honum út aftur. Þá stekkur hann til og stingur þennan mann, sem hann hafði verið að eiga orðastað við, í hálsinn," segir Margeir en gestir staðarins, sem og starfsfólk, hlúðu að þeim slasaða þar til sjúkraliðar komu á staðinn. Árásarmaðurinn var handtekinn á staðnum.

Hann segir að árásarmaðurinn sé af erlendu bergi brotinn en hann hafi augljóslega verið undir áhrifum einhvers konar efna. „Mér skilst að það séu í gangi hættuleg eiturefni og það lýsir sér þannig að menn verða hálf geðveikir til augnanna - hann var akkúrat svoleiðis," segir hann.

Hann segir að starfsfólk staðarins hafi brugðist rétt við aðstæðum í gærkvöldi. „Þetta er sem betur fer fátítt - ég er búinn að vera í þessum bransa í 25 ár og ég hef orðið vitni að því einstaka sinnum að menn séu hirtir með hnífa, en ekki til að fremja svona alvarleg atvik."

Árásarmaðurinn var handtekinn á staðnum og verður hann yfirheyrður í dag. Ekki liggur fyrir hvort krafist verður gæsluvarðhaldsúrskurðar yfir honum. Lögreglan á höfuðborgarsvæðinu rannsakar málið sem stórfellda líkamsárás.