Demel á leið til Englands

Fílabeinsstrendingurinn Guy Demel gæti verið á leið til Englands frá þýska félaginu Hamburg. Frank Arnesen, framkvæmdarstjóri félagsins, segir að svo gæti farið að gengið verði frá samningum þess efnis fyrir vikulok.

Demel var í janúar síðastliðnum hársbreidd frá því að ganga til liðs við Sunderland en ekkert varð úr því. Hann á eitt ár eftir af samningi sínum við Hamburg.

„Það eru nokkur félög í Englandi sem hafa áhuga á Guy. Svo gæti farið að það verði búið að ganga frá félagaskiptum hans á sunnudaginn,“ sagði Arnesen við þýska fjölmiðla.

Arnesen hefur verið duglegur við að kaupa leikmenn til Hamburg síðan hann kom til félagsins. Nú síðast keypti félagið David Rozehnal frá Lille fyrir hálfa milljón evra. Rozehnal lék áður með Newcastle en átti erfitt uppdráttar þar.