Fékk greiddar fjórar milljónir fyrir mistök

Héraðsdómur Reykjavíkur dæmdi í dag mann til að endurgreiða 4 milljónir króna sem voru greiddar fyrir mistök inn á reikning hans í Kaupþingi um miðjan desember 2008.

Bankinn sendi manninum áskorun í maí 2009 um endurgreiðslu fjárhæðarinnar þar sem hún hafði verið greidd fyrir mistök og skoraði á manninn að greiða fjárhæðina innan 10 daga að viðlögðum frekari innheimtuaðgerðum. Greiðsla barst ekki og því stefndi bankinn manninum.

Maðurinn segir hins vegar að skömmu eftir hrun íslensks efnahagslífs í október 2008 hafi erlendur aðili, í Danmörku, haft samband við hann. Sá hafi sagst eiga íslenskar krónur í Danmörku sem væru að verða verðlausar þar. Best væri ef þær yrðu fluttar til Íslands. Þessi erlendi aðili hafi síðan millifært fjórar milljónir króna í byrjun desember og svo aðrar fjórar milljónir um miðjan mánuðinn. Fyrir fyrir greiðsluna keypti maðurinn bifreiðar og annan varning. Fyrir seinni greiðsluna kvaðst maðurinn hafa keypt bréf í fjárfestingabankanum Straumi, sem þá hafði lifað af fárviðrið sem geysaði í íslensku efnahagslífi.

Héraðsdómur segir að reikningsyfirlit mannsins bendi ekki til þess að hann hafi keypt hlutabréf í Straumi. Dómurinn segir að af gögnum málsins verði ekki annað ráðið en maðurinn hafi vitað eða mátt vita, að hann hafi ekki átt lögmætt tilkall til greiðslunnar sem lögð var inn á bankareikning hans um miðjan desembermánuðinn. Hann var því dæmdur til að greiða bankanum 4 milljónir til baka, en hann hafði áður greitt 2,8 milljónir af því.