Fjármögnun RÚV brýtur gegn EES samningnum

Eftirlitsstofnun EFTA hefur úrskurðað að opinber fjármögnun RÚV brjóti gegn EES samningnum. Þá er íslenskum stjórnvöldum gert að tilkynna EFTA um nýtt rekstrarfyrirkomulag eigi síðar en í dag.

Í úrskurði sínum segir Eftirlitsstofnun EFTA að íslensk stjórnvöld séu ábyrg fyrir því að ríkisútvarpið virði lögmál markaðarins. Þannig megi starfsemi hins opinbera á fjölmiðlamarkaði ekki raska samkeppni.

Stjórnvöld verði því að skilgreina útvarpsþjónustu RÚV í almannaþágu og takmarka ríkisstuðning við hana. RÚV er þó einnig heimilt að stunda rekstur sem ekki fellur undir útvarpsþjónustu í almannaþágu en ber þá að halda fjárreiðum vegna þess aðskildum frá rekstri annarrar útvarpsþjónustu.

Ríkisendurskoðun hefur undanfarin ár undirritað ársreikninga RÚV og staðfest að opinber fjármögnun RÚV sé eingöngu varið í útvarpsþjónustu í almannaþágu. Þessu mótmælir nú eftirlitsstofnun EFTA og gerir þá kröfu að ríkið skilgreini hvaða þjónustu sé verið að greiða með skatti.

Þá telur eftirlitsstofnunin brýnt að RÚV megi ekki raska samkeppni á auglýsingamarkaði. Þannig megi RÚV ekki selja auglýsingar eða aðra þjónustu á verði sem er lægra en á almennum markaði. Með úrskurði sínum krefst eftirlitsstofnunin þess að íslensk stjórnvöld tryggi þetta.

Eftirlitsstofnunin gaf út álit sitt fyrir sex vikum og gaf íslenskum stjórnvöldum frest til dagsins í dag til að kynna viðbrögð sín. Í samtali við fréttastofu sagði aðstoðarmaður menntamálaráðherra stjórnvöld hafa óskað eftir fresti og benti á fréttatilkynningu vegna málsins. Þar segir að nefnd verði skipuð en henni er m.a. ætlað að taka afstöðu til þess hvort stofna eigi sérstakt dótturfyrirtæki RÚV sem fer með starfsemi sem ekki fellur undir  útvarpsþjónustu í almannaþágu. Þá á nefndin jafnframt að taka afstöðu til aukins gagnsæis í rekstri RÚV og aukins lýðræðis í stjórnarfyrirkomulagi RÚV.