NBA í nótt: Chicaco nálgast Boston á toppnum

Stuttu eftir að Chicago henti Miami Heat úr öðru sæti Austurdeildarinnar er nú liðið aðeins hársbreidd frá því að ná toppsætinu af Boston Celtics.

Chicago vann sinn fimmta leik í röð í nótt er liðið lagði Atlanta á heimavelli, 94-76.

Á sama tíma tapaði Boston sínum öðrum leik í röð, í þetta sinn fyrir Philadelphia á útivelli, 89-86.

Bæði lið hafa unnið 46 leiki en Boston á leik til góða og er því með örlítið betra sigurhlutfall eins og staðan í deildinni er í dag.

Jafnræði var með Boston og Philadelphia í fjórða leikhluta og þau skiptust á að hafa forystu. En mestu munaði um að Boston skoraði aðeins þrjú stig - öll af vítalínunni - á síðustu sex mínútu leiksins fyrir utan sniðskot Kevin Garnett á lokasekúndunum.

Þá hafði Philadelphia náð fimm stiga forystu í leiknum og kom sú karfa því of seint.

Elton Brand og Spencer Hawes skoruðu fjórtán stig hvor fyrir Philadelphia auk þess sem að Hawes tók tíu fráköst.

Hjá Boston var Nenad Krstic stigahæstur með sextán stig en hann tók einnig fimmtán fráköst. Þríeykið öfluga hjá Boston náði sér ekki á strik í leiknum - Garnett var með fjórtán stig, Paul Pierce ellefu og Ray Allen fimm.

Í sigri Chicago á Atlanta skoraði Derrick Rose 34 stig og átti enn einn stórleikinn fyrir hið kröftuga lið Bulls.

San Antonio er enn með besta árangur allra liða í NBA-deildinni en liðið vann í nótt sinn 53. leik á tímabilinu er liðið lagði Sacramento, 108-103.

Liðið er með nokkuð þægilega forystu á Dallas og LA Lakers á toppi Vesturdeildarinnar og eina liðið þar sem er þegar búið að tryggja sér sæti í úrslitakeppninni.

Tony Parker skoraði 27 stig fyrir liðið í nótt og Manu Ginobili var með 24.

Toronto vann Indiana, 108-98. Leandro Barbosa skoraði 29 stig fyrir Toronto.

Charlotte vann Portland, 97-92. Stephen Jackson skoraði 29 stig fyrir Charlotte, þar af átján í fjórða leikhluta.

Minnesota vann Utah, 122-101. Kevin Love skoraði 24 stig og tók tólf fráköst fyrir Minnesota. Þar með hefur hann náð 53 tvöföldum tvennum í röð og heldur því áfram að bæta metið sem hann setti fyrr í vikunni.

Oklahoma City vann Detroit, 104-94. Kevin Durant skoraði 24 stig og James Harden 22.

Golden State vann Orlando, 123-120, í framlengdum leik. Monta Ellis var með 39 stig og ellefu stoðsendingar fyrir Golden State og Dorell Wright 32 stig. Orlando náði mest 21 stigs forystu í leiknum en það dugði ekki til.