Öll rannsókn efnahagsbrota verður í nýrri stofnun

Stefnt verður að því að öll rannsókn og saksókn efnahagsbrota á Íslandi verði sameinuð í nýja stofnun að norskri fyrirmynd, segir Ögmundur Jónasson innanríkisráðherra. Fyrsti vísirinn að slíku er sameining efnahagsbrotadeildar ríkislögreglustjóra og sérstaks saksóknara í september næstkomandi.



Innanríkisráðherra flutti ávarp á sérstakri málstofu í Þjóðminjasafninu í morgun um stöðu ákæruvaldsins.



„Ákveðið hefur verið að sameina efnahagsbrotadeild ríkislögreglustjóra og embætti sérstaks saksóknara og er verið að vinna að lagabreytingum í ráðuneytinu sem að þessu snúa. Ríkislögreglustjóri, ríkissaksóknari, settur ríkissaksóknari í málefnum sérstaks saksóknara og sérstakur saksóknari hafa bent á að sterk rök séu fyrir því að innan þriggja ára verði til ný rannsóknarstofnun, Økokrim, sem annist alla rannsókn og saksókn í alvarlegum, flóknum og umfangsmiklum fjármála- og efnahagsbrotum. Ég tel að stefna eigi að því að koma á laggnirnar einni sterkri stofnun sem taki yfir allar rannsóknar efnahagsbrotamála á víðtækum grundvelli," sagði Ögmundur. Hann sagðist ætla að hefja könnunarviðræður um sameiningu í eina rannsóknarstofnun í samræmi við tillögur sérfræðinganna.

Nálgast má upplýsingar um hina norsku stofnun, sem allir sérfræðingar í rannsókn og saksókn efnahagsbrota á Íslandi horfa til sem fyrirmyndar, sem og ráðherrann, má nálgast hér. thorbjorn@stod2.is