Öldruð kona handtekin fyrir að selja geimgrjót

Dularfull leyniaðgerð Nasa hefur vakið athygli fjölmiðla í Bandaríkjunum, en fréttastofa AP greinir frá því að 72 ára gömul kona hafi verið handtekin eftir að hún reyndi að selja örlítið geimgrjót frá tunglinu. Það er ekki mikið stærra en hrísgrjón.

Þannig er mál með vexti að það er ólöglegt að selja steina frá tunglinu þar sem ríkið lítur svo á að grjótið sé eign þess. Alls var komið með 2200 grjótsýni frá tunglinu í geimferðum Bandaríkjamanna á árunum 1969 til 1972.

Ríkisstjórn Bandaríkjanna hefur gefið söfnum í 90 löndum tunglsteina og einhverjum einstaklingum að auki, en skilyrðið er ávallt það sama - steinana má ekki selja, þar sem þeir eru eign stjórnvalda.

Hin 72 ára gamla Joann Davis frá Kaliforníu í Bandaríkjunum, reyndi selja rykkorn frá tunglinu og örlítinn bút úr hlíf eins af Appollo geimferjunum sem fóru út í geiminn á þessum árum. Eiginmaður Joann var verkfræðingur í fyrirtæki sem kom að smíði varahluta í geimförin.

Sjálf vildi Joann meina að maðurinn hennar hefði fengið þessa muni frá Neil Amstrong sjálfum, sem steig fyrstu manna á tunglið - hann segist þó ekki kannast við það.

Joann setti sig í samband við verktaka á vegum Nasa og spurði hvað hún ætti að gera varðandi söluna. Sá lét Nasa umsvifalaust vita og sérfræðingar þeirra skipulögðu leyniaðgerð til þess að endurheimta munina. Þeir þóttust ætla að kaupa geimdótið fyrir tæplega tvær milljónir dollara, eða 230 milljónir króna.

Joann hitti svo flugumann Nasa og þegar hún dró munina upp þustu að henni sérsveitarmenn og rannsóknarlöggur á vegum Nasa. Í grein AP kemur fram að konunni hafi brugðið svo mikið að hún hafi misst stjórn á þvagblöðrunni.

Hún var því næst færð til yfirheyrslu en sleppt skömmu síðar, án góssins sem hún ætlaði að selja.

Fréttastofa AP hefur svo reynt að fá upplýsingar um málið en Nasa gefur ekkert upp. Hún var ekki bókuð hjá lögreglunni og því óljóst hvar málið stendur. Nú er svo komið að Joann ætlar að fara í mál við Nasa út af handtökunni.

Sérfræðingur, sem vann við að endurheimta tunglgrjót, segir Joann eiga góða möguleika á að sigra málið, þar sem Nasa hafi ekki farið mjög vel með geimgrjótið í gegnum tíðina.

Ástæðan fyrir því að Joann vildi selja munina var til þess að skilja eftir vænan arf handa börnum og barnabörnum og annast veikan son sinn.