Pólitískt forystuleysi að valda þjóðinni skelfilegum skaða

Forseti Alþýðusambandsins, Gylfi Arnbjörnsson, segir fimmtán þúsund manna atvinnuleysi nú nógu slæmt en það stefni í að verða enn verra í vetur; fari yfir tíu prósent og 17-18 þúsund manns verði án atvinnu.

Með stöðugleikasáttmálanum fyrir ári voru kynnt áform í atvinnumálum sem fæst hafa náð fram að ganga. Forseti ASÍ kennir stjórnarflokkunum um. Landið búi við forystuleysi og í raun pólitíska kreppu. Það sé mjög erfitt að koma málum í gegn og það sé að valda þjóðinni skelfilegum skaða.

ASÍ hvetur ríkisstjórnina til að greiða fyrir verkefnum eins og virkjunum í Þjórsá og á Reykjanesi. Gylfi segir hægt að skapa mikið af störfum með því að nýta tækifæri í stóriðjunni. Þar séu fyrirtæki að banka upp á en fái í raun mjög lítil svör.

Það sama eigi við um samgöngumálin. Lífeyrissjóðir hafi lagt fram 100 milljarða króna á borðið til að fjármagna framkvæmdir fyrir ríkissjóð á næstu fjórum árum. Þetta sé að rykfalla á borðum.

Gylfi segir skelfilegt að hugsa til þess að það sé hægt að fjármagna verkefni en ekki sé farið í þau. Ástæðan sé sú að það sé ekki búið að taka ákvarðanir á vettvangi stjórnmálanna um hvernig eigi að gera þetta.