Velferðakerfið þolir ekki meira

Formaður BSRB, Elín Björg Jónsdóttir, segir frekari niðurskurð á velferðarkerfinu geta valdið varanlegu tjóni. Gylfi Arnbjörnsson, forseti AsÍ, segir ríkisstjórnina nú þegar hafa fullnýtt heimild sína til skattahækkana samkvæmt stöðugleikasáttmálanum og því sé eingöngu hægt að skera niður í ríkisútgjöldum.

Jóhanna Sigurðardóttir forsætisráðherra sagði á Alþingi í gær að niðurskurður í velferðarkerfinu væri kominn að þolmörkum. Hún viðurkenndi um leið að ríkisstjórnin stæði fyrir miklum vanda við fjárlagagerð næsta árs.

„Ég fagna yfirlýsingu forsætisráðherra," segir Elín Björg. „Hún er í fullu samræmi við loforð ríkisstjórnarinnar og álit og varnarorð BSRB. Yfir þessi þolmörk má ekki undir neinum kringumstæðum fara því það getur valdið varanlegu tjóni á velferðarþjónustunni. Ríkisstjórnin verður að forgangsraða verkefnum sínum þannig að staðið sé vörð um velferðarkerfið."

Ekki frekari skattahækkanir

„Heimilin eru fyrir löngu síðan komin yfir þolmörk skattahækkana," segir Gylfi. „Í sáttmálanum sem við ásamt öðrum gerðum við ríkisstjórnina á síðasta ári á að hlífa velferðarkerfinu eins og hægt er og beina niðurskurðinum að stjórnsýslunni. Það samkomulag er auðvitað ennþá í gildi."

Vilhjálmur Egilsson framkvæmdastjóri Samtaka atvinnulífsins hefur sagt að til þess að hægt sé að ná markmiðum stöðugleikasáttmálans verði ríkið að skera niður um 50 milljarða króna til viðbótar við það sem nú þegar er áformað. Nú sé staðan sú að á þessu og síðasta ári er búið að hækka skatta um 72 milljarða króna en lækka útgjöld um 38 milljarða króna. Til að hægt verði að standa við þau hlutföll sem samið hafi verið um í stöðugleikasáttmálanum segja Samtök atvinnulífsins að útgjöld þurfi að lækka mun frekar, eða sem nemur 88 milljörðum króna.