Eurovision: Svíar öskureiðir - Anna þurfti áfallahjálp

„Leggið þessa skítakeppni niður!" er meðal vinsælustu frasa Svíþjóðar í dag. Svíar eiga ekki orð yfir því að Anna Bergendahl skyldi ekki hafa verið kosin áfram úr undanúrslitum Eurovision í gærkvöldi. Dagblöðin þar birtu fyrirsagnir á borð við „Neiiiiiiiii!" í dag.

Það kom ekki bara Svíum á óvart að þeir skyldu ekki komast í úrslitin í fyrsta skipti í sögu keppninnar. Þeir hafa 50 sinnum verið í úrslitum og margir sérfræðingar höfðu veðjað á sigur Önnu á morgun.

Sjálf var Anna greyið í sjokki, enda aðeins 18 ára gömul og undir mikilli pressu. Hún þurfti áfallahjálp í gærkvöldi og komu sérfræðingar henni til hjálpar á hótelherbergið.

Þá eru uppi háværar raddir heimafyrir að það þurfi að skipta út stjórnanda Melodiefestivalen, undankeppni Svíanna. Hún er gríðarlega vinsæl, um 300 þúsund atkvæði bárust þegar Anna vann í úrslitunum í mars. Nú eru Svíar einnig farnir að velta því fyrir sér hvort þeir hefðu frekar átt að velja söngvarann í öðru sæti, sem heitir Selem al Fakir.

Anna keyrði heim til Svíþjóðar með foreldrum sínum í hádeginu í dag. Þeir sögðust ætla að gefa henni taco í matinn í kvöld, uppáhaldið hennar.

Svíar geta þó huggað sig við að að fimm af þeim sænsku lögum sem tóku þátt í keppninni komust áfram. Sænskir lagahöfundar eru skráðir fyrir Drip Drop frá Aserbaídjan, In A Moment Like This frá Danmörku, It's For You frá Írlandi, Shine frá Georgíu og My Heart Is Yours frá Noregi.