Varðskipið Óðinn 50 ára

Varðskipið Óðinn er 50 ára í dag en skipið tók þátt í öllum þremur þorskastríðunum á 20. öldinni. Síðasta sjóferð Óðins fyrir Landhelgisgæsluna var farin fyrir fjórum árum.

Óðinn kom til landsins 27. janúar 1960 en hann var smíðaður í Álaborg í Danmörku árið 1959. Skipið er 910 tonn að stærð, 63 metrar á lengd og 10 metrar á breidd.

Varðskipið tók þátt í öllum þremur þorskastríðunum á 20. öldinni. Öflugasta vopn skipsins var 57 millimetra fallbyssa, staðsett á palli fyrir framan brúna. Þekktasta og árangursríkasta vopnið í þorskastríðunum voru þó togvíraklippurnar.

„Óðinn reyndist sérlega vel sem björgunarskip. Hann dró alls tæplega 200 skip til lands eða í landvar vegna bilana, veiðarfæra í skrúfu eða eldsvoða um borð. Einnig dró hann flutninga- og fiskiskip fjórtán sinnum úr strandi. Þá bjargaði skipið áhöfnum strandaðra skipa þrisvar sinnum og tvisvar bjargaði það áhöfnum sökkvandi skipa," segir á vef Landhelgisgæslunnar.

Þar segir jafnframt að Óðinn hafi sinnt almennu veiðieftirliti alla tíð og beindist það bæði að íslenskum og erlendum skipum. Fylgjast þurfti með hvar var veitt og hvernig veiðarfærin voru. Einnig var Óðinn oft kallaður til þegar ófærð var í landi og erfiðleikar við fólks- og vöruflutninga, ekki síst í afskekktustu byggðum landsins.

Síðasta sjóferð Óðins í þágu Landhelgisgæslunnar var farin í júní 2006.

Gestir geta rætt við fyrrum skipverja

Í tilefni af afmæli varðskipsins Óðins verður fólki boðið frítt inn helgina 30. til 31. janúar í Víkina - Sjóminjasafnið í Reykjavík á Grandagarði, þar sem gestir geta gengið um borð í varðskipið og rætt þar við fyrrum skipverja af Óðni.

Í dag verður haldin móttaka í Sjóminjasafninu Grandagarði  milli klukkan 17 og  19 fyrir hollvini og áhugamenn um varðveislu skipsins, þar sem Ragna Árnadóttir dómsmálaráðherra, Georg Kr. Lárusson forstjóri Landhelgisgæslunnar, Guðmundur Hallvarðsson formaður Hollvinasamtaka Óðins og Vilhjálmur Þ. Vilhjálmsson, stjórnarformaður Víkurinnar - Sjóminjasafnsins í Reykjavík, munu ávarpa gesti.