Sóley Tómasdóttir: Skipaði engum - náðum ekki að tala saman

„Auðvitað var ég ekki að skipa neinum að gera eitt né neitt og það myndi aldrei hvarfla að mér," segir Sóley Tómasdóttir, borgarfulltrúi Vinstri grænna, um sérkennilega uppákomu sem varð á borgarstjórnarfundi í dag. Þá sagði hún við varaborgarfulltrúann Hermann Valsson, að þau ættu að sitja hjá eftir að hann hafði greitt gegn frávísunartillögu meirihlutans um sameiningu Reykjavíkur og Álftaness.

Sjálf var hún skrifari á fundinum og tók niður atkvæði í nafnakalli. Þegar Hermann var spurður um afstöðu sína sagði hann fyrst já. Svo breytti hann svarinu í nei. Sóley segist þá hafa sagt úr pontu: „Við skulum sitja hjá."

Þá endurtók Hermann fyrra svar sitt; hann sagði nei og kaus því gegn frávísun.

„Við Hermann höfðum ekki náð að ræða saman um það sem við ætluðum að gera í minnihlutanum," útskýrir Sóley og bætir við: „Vegna hlutverks míns sem skrifari þá kann að vera að þetta hafi hljómað eins og það gerði en ég var að reyna að miðla upplýsingum til Hermanns sem ég var ekki í stöðu til þess að gera."

Sóley segist sem sagt ekki hafa haft tækifæri til þess að ræða við Hermann hvernig þau skyldu greiða atkvæði í málinu.

„En það myndi ekki hvarfla að mér að fara að segja einhverjum hvernig hann ætti að greiða atkvæði í borgarstjórn Reykjavíkur," áréttar Sóley sem telur túlkanir Ólafs F. Magnússonar um fundinn vera alrangar. Hún hafi ekki skipað neinum að gera neitt.

„Það má öllum vera ljóst að túlkanir Ólafs F. Magnússonar á því sem gerist á borgarstjórnarfundum er með öðrum hætti en hjá mörgum öðrum," segir Sóley að lokum ómyrk í máli.

Ekki náðist í Hermann Valsson við vinnslu fréttarinnar.