Búið að slökkva eld um borð í Oddeyrinni

Búið er að slökkva eldinn sem kom upp í vélarrúmi Oddeyrarinnar, skuttogara í eigu Samherja sem lá bundinn við bryggju í Hafnarfjarðarhöfn. Reykkafarar unnu bug á eldinum fljótt og örugglega en töluverður eldur var í vélarrúminu að sögn vaktstjóra hjá Slökkviliði höfuðborgarsvæðisins.

Nú er unnið að kælingu í skipinu og reynt að útiloka að glóð leynist um borð. Áfram verður vakt við skipið fram eftir kvöldi en þegar hæst lét voru 18 slökkviliðsmenn á staðnum á sex bílum.

Ekkert er vitað um orsakir eldsins og verður það rannsakað. Áhafnarmeðlimir Oddeyrarinnar voru um borð þegar eldurinn kom upp, þar af tveir í vélarrúminu og náðu þeir að forða sér frá borði og tilkynna um eldinn.