Dómur setur aukinn þrýsting á stjórnvöld

Talið er að bankarnir muni nota dóm Héraðsdóms Suðurlands frá því í gær um gengislán sér til framdráttar. Þar er lántakendum gert að greiða að fullu erlent lán. Talsmaður neytenda segir dóminn setja aukinn þrýsting á stjórnvöld að leysa skuldavanda heimilanna.

Sambýlisfólki á Selfossi hefur verið gert að greiða að fullu erlent lán. Sigurður Gíslason, dómari, telur óumdeilt að lánið hafi verið í erlendri mynt og féllst ekki á lagarök stefndu um að lánið sé gengistryggt í íslenskum krónum og þar með ólögmætt.

Fólkið fékk andvirði 20 milljóna króna í japönskum jenum og svissneskum frönkum að láni hjá Glitni árið 2007, en það var greitt inn út í íslenskum krónum. Lánið var gjaldfellt í desember 2008 vegna vanskila, en þá stóð höfuðstólinn í tæpum 40 milljónum króna og afborganir höfðu tvöfaldast. Fólkið var dæmt til að greiða Íslandsbanka þessa upphæð, ásamt dráttarvöxtum og málskostnaði.

Í samtali við fréttastofu í dag sagði Ólafur Björnsson, sem tapaði málinu í gær að hann myndi ákveða það í samráði við lögmann sinn í næstu viku hvort dómnum verði áfrýjað.

Ólafur sagðist túlka niðurstöðuna sem útlegðardóm yfir sér og fjölskyldu sinni. Hann stefni í gjaldþrot og flytji líklega með fjölskyldu sína af landi brott.

Gísli Tryggvason, lögmaður og talsmaður neytenda, segir um að ræða fyrsta dóminn af þessu tagi þar sem afstaða er tekin til forsendubrests:

„og hafnar því sjónarmiði, sem er soldið sérstakt að mínu mati því þetta er rótgróið lagasjónarmið og ef forsendubrestur á ekki við þegar kerfið hrynur og skuldir tvöfaldast eða u.þ.b. þá veit ég ekki hvenær það á við," segir Gísli og segir að skuldarar geti litið á dóminn jákvæðum augum. „og segja að úr því að dómstólar reynast ekki sú bolvörn sem menn vonuðust eftir sé enn meiri þrýstingur á löggjafann og stjórnvöld að leysa málið."

Ljóst er að dómurinn fellur á viðkvæmum tímapunkti, en unnið er hörðum höndum við að finna lausnir á skuldamálunum að undanförnu.

Í stjórnkerfinu búa menn undir það að bankarnir grípi til vopna í ljósi þessarar óvæntu niðurstöðu og muni reyna að nýta sér dóminn sér til hagsbóta.